Afurika y'Epfo: Urubanza ku nyubako ya Zuma

Uwufise ububasha kw’isanamu AFP
Image caption Inyubako bwite ya Nkandla yabereye Jacob Zuma ikibazo gikomeye

Urukiko rwo hejuru muri Afurika y’Epfo ruri busuzume niba perezida Jacob Zuma yagombye kwishyura akayabo ka miliyoni cumi n’eshanu z’amadolari (15.000.000) z’umutungo wa leta zakoreshejwe mu kuvugurura inzu ye.

Icyegeranyo cyo mu mwaka wa 2004 cyakozwe n’urwego rwigenga cyerekanye ko Bwana Zuma yungukiye muri iri vugurura mu buryo butaboneye. Yemeye kwishyura amwe muri ayo mafaranga ariki urubanza rw’ikirego cytanzwe n’amashyaka atavuga rumwe na leta rurakomeza nta kabuza.

Hateganyijwe imyigaragambyo ikaze iyobowe na Julius Malema, wahoze ashyigikiye bikomeye bwana Zuma ariko bakaza gushwana.

Umuvugizi w’ishyaka rye ry’abarwanira ubwigenge mu bukungu (Economic Freedom Fighters, EFF) yavuze ko imyigaragambyo igamije kwamagana “ruswa n’icyenewabo”.

Ariko ishyaka rya Zuma, ANC ryavuze ko imyigaragambyo iteganyijwe ari “igikorwa cya politike”.