Perezida Museveni yitabiriye ibiganiro mpaka

Uwufise ububasha kw’isanamu Reuters
Image caption Perezida Museveni amaze imyaka 30 ku butegetsi.

Perezida wa Uganda Yoweri Museveni yitabiriye ikiganiro mpaka cyo kuri televiziyo gihuza abakandida biyamamariza umwanya wa perezida mbere y’amatora yo ku wa Kane.

Bwana Museveni yasuzuguye ibiganiro bya mbere byo mu kwezi gushize, avuga ko ngo ari iby’abana bo mu mashuri.

Umutegetsi wa Uganda w’imyaka 71, ari kugerageza kongera imyaka 30 amaze ku butegetsi, arashaka kwitoza ku nshuro ya gatanu.

Intego y’ikiganiro mpaka cya kabiri iribanda kuri politike y’ububanyi n’amahanga, ndetse n’umutekano w’igihugu, ingingo zibonwa nk’iziha ingufu perezida Museveni.

Ikiganiro cya mbere cyibanze kuri politike ireba imbere mu gihugu nk’ubuzima ndetse n’uburezi.

Abakandida umunani bari guhatanira muri aya matora, azaba ku wa Kane w’icyumweru gitaha.

Kuri uwo munsi abaturage bazanatora abagize inteko ishinga amategeko.

Umunyamakuru wa BBC, Catherine Byaruhanga, aravuga ko ku nshuro ya mbere umuyobozi w’ishyaka National Resistance Army, NRM, ahanganye n’abakandida babiri bakomeye.

Ni Kizza Besigye na Amama Mbabazi wahoze ari Minisitiri w’Intebe ndetse wari inkoramutima ya Bwana Museveni.

Bwana Besigye ariyamamaza mu ishyaka riharanira impinduka inyuze muri demokarasi, Democratic Change, mu gihe Bwana Mbabazi yiyamamaza nk’umukandida wigenga akoresheje ishyirahamwe ryotsa igitutu, GoForward.

Ibiraje ishinga abaturage mu gihe cy’amnatora, birimo ibura ry’akazi ryabaye karande, ruswa ndetse no kutabona ibikorwa bitangwa n’inzego za leta.

Ibindi kuri iyi nkuru