Impanuka ikomeye muri Ghana yishe 53

Polisi iravuga ko bisi yagonganye n’ikamyo mu majyaruguru ya Ghana yica abantu 53.

Imodoka yo mu bwoko bwa coach itwara abagenzi yagonganye n’ikamyo itwara imizigo yari ipakiye inyanya hafi y’umujyi wa Kintampo mu ijoro ryacyeye.

Umukuru wa polisi muri ako gace, Maxwell Atingane yabwiye ibiro ntaramakuru Reuters ko abagenzi benshi bapfiriye ahabereye impanuka.

Yavuze ko polisi iri gukora iperereza ku mpamvu yateye impanuka, inatecyerezwa kuba mbi mu gihe cy’imyaka myinshi ishize.

Urubuga rwa interniti Joy News, rwo muri Ghana rwavuze ko umugenzi yabwiye polisi ko iyi bisi yari ifite ibibazo bya feri.

Abantu bagera kuri 23 bari kuvurirwa ku bitaro. Bisi yari yuzuye abagenzi yerekeza mu majyaruguru ya Kumansi, umujyi wa kabiri munini nyuma y’umurwa mukuru Accra.

Umunyamakuru wa BBC Sammy Darko uri i Accra, yavuze ko abantu benshi batewe umujinya n’amafoto ateye ubwoba yakwirakwijwe ku mbuga nkoranya mbaga nyuma y’impanuka.

Biravugwa ko inzego zikora ibikorwa by’ubutabazi zakoze amasaha menshi zigerageza gutabara abagenzi bari baheze mu mpanuka.

Perezida John Mahama yakoresheje urubuga nkoranyambaga rwa Twitter mu koherereza ubutumwa bw’akababaro imiryango y’ababuze ababo.