Umutoza w'Ubwongereza, Roy Hodgson, arashima ikipe ye nyuma yo gutsinda Ubudage

Roy Hodgson Uwufise ububasha kw’isanamu Getty Images
Image caption Umutoza w'ikipe y'Ubwongereza, Roy Hodgson

Roy Hodgson yavuze ko yishimye cyane ikipe ye yishyuye ibitego yari yatsinzwe n'Ubudage mu nyuma ikaza no kubutsinda mu mukino wa gicuti wabaye kuwa gatandatu.

Igitego cy'umutwe cya Eric Dier mu minota ya nyuma y'umukino cyatumye Ubwongereza butsinda Ubudage ibitego 3-2 muri sitade ya Olympiastadion iri i Berlin.

Hodgson yagize ati: " Ni umukino wa gicuti ariko intambwe iracyari ndende kuri twebwe kugirango tube twagera ku byo Ubudage bwagezeho mu mukino w'umupira w'amaguru."

Ibitego by'Ubudage byatsinzwe na Toni Kroos na Mario Gomez naho ibindi bibiri by'Ubwongereza bitsindwa na Harry Kane na Jamie Vardy.

Hodgson, w'imyaka 68, yasimbuye Fabio Capello mbere y'irushanwa ry'igikombe cy'Uburayi cyo muri 2012 igihe Ubwongereza bwatsindwaga n'Ubutaliyani muri kimwe cya kane.

Kuva aho ikipe y'Ubwongereza iyoborewe na Hodgson, imaze gutsinda Brasil n'Ubufaransa mu mikino ya gicuti yabereye kuri sitade ya Wembley kandi yananganyije na Brasil iwayo.