Jack Wilshere: Umukinnyi wa Arsenal yagarutse mu ikipe y'abari munsi y'imyaka 21 nyuma y'amezi 10 y'imvune

Jack Wilshere Uwufise ububasha kw’isanamu Reuters
Image caption Wilshere yagize imvune 21 kuva mu kwa Mbere 2013. Ni imvune nyinshi ziruta iz'abandi bakinnyi bose muri shampiyona y'Ubwongereza.

Umukinnyi wa Arsenal wo hagati, Jack Wilshere aheruka gukina umukino nyuma y'amezi 10, yabanje mu ikipe y'abari munsi y'imyaka 21 mu mukino wabahuje na Newcastle ku wa Gatanu.

Uyu mukinnyi w'Umwongereza w'imyaka 24, ntarakinira ikipe ye cyangwa igihugu cye nyuma yo kuvunika mu kwezi kwa Gatandatu muri 2015.

Ariko yashoboye gukina iminota 65 mu mukino wa shampiyona y'abatarengeje imyaka 21.

Wilshere yagize ati: "Ndashaka kujya mu mikino y'igikombe cy'Uburayi. Kugira ngo mbigereho, ngomba gukina muri Arsenal, ubwo rero ngomba kwereka abatoza ba Arsenla n'Ubwongereza icyo nshobora gukora."

"Numvise merewe neza kugaruka nkongera gukina. Sinditegura neza kugira ngo nge mu ikipe nkuru, ariko ni indi ntamwe mu nzira yo gukira [imvune]. Byari bimeze neza gukina mu mukino, bitandukanye n'imyitozo."

Arsenal ifite imikino irindwi isigaje gukina muri shampiyona y'Ubwongereza, mu gihe umutoza w'Ubwongereza Roy Hodgson azatangaza abakinnyi bagize ikipe y'igihugu bazakina imikino y'igikombe cy'Uburayi (Euro 2016) ku itariki ya 12 z'ukwezi kwa Gatanu.

Igaruka rya Wishere ni ikintu gikomeye k mutoza Hodgson, cyane cyane ko aje nyuma y'uko undi mukinnyi w'Umwongereza, Jordan Henderson avunikiye ivu, bigatuma atazongera gukina kugeza shampiyona irangiye.

Undi mukinnyi umaze igihe kinini yaravunitse, Tomas Rosicky, nawe yagaragaye mu ikipe ya Arsenal yatsinze 3-1 ku kibuga cya Emirates.

Rosicky w'imyaka 35, umwenegihugu wo muri Repubulika ya Czech, amaze igihe yaravunitse mu itako byatumye akina umukino umwe gusa muri iyi shampiyona.