Rio 2016: Ikipe ya Nijeriya yakererejwe n'"ubuto bw'indege"

Nigeria's Mikel John Obi Uwufise ububasha kw’isanamu Getty Images
Image caption Umukinnyi wa Chelsea, Mikel John Obi azaba ari kapiteni w'ikipe ya Nijeriya muri Olempike

Ikipe y'umupira w'amaguru ya Nijeriya izagera i Rio amasaha macye mbere y'umukino wayo wa mbere mu marushanwa ya Olempike nyuma yo gukerererwa kubera ubuto bw'indege.

Abakinnyi bari baheze ku kibuga cy'indege i Atlanta, muri Leta Zunze Ubumwe za Amerika, kubera ibibazo bushingiye ku bwishyu bw'amatike yabo.

Ushizwe itangazamakuru mu ikipe ya Nijeriya, Timi Ebikagboro yabwiye BBC Sport ati:

"Abakinnyi ntibari bashimishijwe n'ingano y'indege"

Yavuze ko bazagenda mu ndege nini bagere i Rio ku gihe mbere y'umukino wabo bazakina n'Ubuyapani ku wa Gatanu saa 01:00 ku isaha mpuzamahanga (GMT).

Yongeyeho ati: "Guverinoma ya Nijeriya yabigizemo uruhare".

"Abakinnyi bizejwe ko bazahabwa ubuvuzi bukenewe mu ndege. Byari bigoye ariko tuzaba twiteguye mbere y'umukino wa mbere".

Indege yabo irahaguruka saa 1200 GMT mu rugendo rw'amasaha arindwi berekeza i Manaus, aho ikipe yabo izakinira umukino wayo wa mbere nyuma y'amasaha 13 gusa mu itsinda B.

Ikipe yari yabanje gukerererwa iri ku kibuga cy'indege i Atlanta kubera ibibazo bisa n'ibifitanye isano n'amafaranga yagombaga guca mu makonti menshi atandukanye ndetse akanahidurwa.

Umuntu uba hafi y'ishyirahamwe ry'umupira w'amaguru muri Nijeritya (NFF) yabwiye BBC Sport ati:

"Amafaranga yishyiwe na minisiteri y'imikino ntiyageze kuri konti y'ikompanyi y'indege ku wa Kabiri. Ubwo rero banze [kompanyi] gutwara abakinnyi muri Brezil"

Umwe mu bakinnyi yabwiye BBC Sport ku wa Gatatu ati: " Twabwiwe kwitegura gufata urugendo mu masaha macye ariko ibi bimaze igihe bikururana kuva mu cyumweru gishize".

Nijeriya iri mu itsinda B mu mikino y'amarushanwa ya olempike i Rio iri kumwe na Suwede, Kolombiya n'Ubuyapani, ifite ibigwi bikomeye mu marushanwa ya Olempike.

Mu mwaka wa 1996, yabaye ikipe ya mbere ya Afurika yatwaye umudali wa zahabu itari iyo ku mugabane w'Uburayi cyangwa iyo muri Amerika y'Amajyepfo.

Mu mikino yabereye i Beijing muri 2008, barangije ku mwanya wa kabiri aho umutoza w'abari munsi y'imyaka 23, Siasia yanatoje ikipe yiswe 'Dream Team' mu Bushinwa.