Ranieri: "Inzozi zanjye zahise zizima"

Claudio Ranieri Uwufise ububasha kw’isanamu Rex Features
Image caption Ranieri yavuze ko yagize ibyishimo bidasanzwe kandi atazibagirwa mu ikipe ya Leicester.

Claudio Ranieri yavuze ko inzozi ze zahise zizima burundu akimara kwirukanwa ku kazi k'ubutoza mu ikipe ya Leicester City.

Yirukanywe nyuma y'amezi icyenda gusa agejeje Leicester ku gikombe cya shampiyona y'Ubwongereza.

Ranieri, w'imyaka 65, yahesheje Leicester igikombe cya shampiyona umwaka ushize mu buryo butari bwitezwe na benshi mu ntangiriro z'irushanwa.

Ubu ariko ibintu ntibimeze neza muri iyo kipe kubera ko irimo kurwanira cyane kutamanuka mu kiciro cya kabiri mu gihe hasigaye gusa imikino 13 muri shampiyona y'Ubwongereza.

Ukwirukanwa kwa Ranieri kubaye nyuma y'amasaha 24 gusa Leicester itsinzwe 2-1 n'ikipe ya Sevilla yo muri Espagne mu irushanwa ry'igikombe cy'Uburayi.

Kuwa gatandatu ushize Leicester yasezerewe mu gikombe cya FA n'ikipe ya Millwall yo mu kiciro cya kabiri.

Ranieri yavuze ko yagize ibyishimo bidasanzwe kandi atazibagirwa mu ikipe ya Leicester.