Iperereza ku gikombe cy'isi 2018 na 2022

Sepp Blatter Uwufise ububasha kw’isanamu Getty Images
Image caption Sepp Blatter yavuye ku buyobozi bwa FIFA yari amazeho imyaka 17 igihe yari amaze guhagarikwa mu bikorwa byose by'umupira w'amaguru.

Ubushinjacyaha bwo mu Bufaransa burimo gukora iperereza ku kuntu igikorwa cyo guhitamo ibihugu bizakira imikino ya nyuma y'igikombe cy'isi cya 2018 na 2022 cyagenze.

Abashinjacyaha bahase ibibazo Sepp Blatter wigeze kuyobora ishyirahamwe mpuzamahanga ry'umupira w'amaguru ku isi, FIFA.

Ikinyamakuru Le Monde cyo mu Bufaransa kiravuga ko ubushinjacyaha burimo gukora iperereza ku byaha bya ruswa.

Mu kwezi kwa gatatu, FIFA yahaye ibimenyetso abategetsi b'Ubusuwisi na Leta zunze ubumwe za Amerika nabo batangiye kuyikoraho iperereza FIFA hashize imyaka ibiri.

Mu kwezi kwa gatanu muri 2015, abategetsi b'Ubusuwisi bagiye gusaka mu ihoteli maze bata muri yombi abantu barindwi bari muri 14 bakurikiranyweho ibyaha bya ruswa mu iperereza rya minisiteri y'ubucamanza ya Amerika.

Mu kwezi kwa 12 k'uyo mwaka abandi bayobozi 16 barashinjwe nyuma y'itabwa muri yombi ry'abavisi perezida babiri ba FIFA bari mu ihoteli imwe mu mujyi wa Zurich.

Sepp Blatter yavuye ku buyobozi bwa FIFA yari amazeho imyaka 17 igihe yari amaze guhagarikwa mu bikorwa byose by'umupira w'amaguru mu gihe cy'imyaka 8 - imyaka yaje kugabanywa ikagera kuri itandatu.