Arsene Wenger yanze kuvuga kuri hazaza he

Wenger w'imyaka 67 y'amavuko, yatangiye gutoza Arsenal kuva mu mwaka wa 1996 Uwufise ububasha kw’isanamu PA
Image caption Wenger w'imyaka 67 y'amavuko, yatangiye gutoza Arsenal kuva mu mwaka wa 1996

Umutoza w'ikipe ya Arsenal muri shampiyona y'umupira w'amaguru mu Bwongereza yanze kuvuga niba azakomeza gutoza iyi kipe cyangwa agasezera ku kuyitoza.

Arsene Wenger yabivuze ubwo yateraga urwenya rw'ukuntu yabeshyewe ko yavuze ko yaba ubu yaramaze gufata umwanzuro niba azasinya amasezerano mashya cyangwa azahagarika gutoza ikipe ya Arsenal.

Wenger w'imyaka 67 y'amavuko, yatangiye gutoza Arsenal kuva mu mwaka wa 1996 kandi amasezerano ye yo gutoza iyi kipe ararangirana n'impera ya shampiyona y'uyu mwaka.

Mu kwezi kwa kabiri, yavuze ko mu kwezi kwa gatatu cyangwa se ukwa kane aribwo yari kuba yatanze umwanzuro kukuba yakomeza gutoza ikipe ya Arsenal cyangwa yasezera ku gutoza iyi kipe.

Mu kiganiro n'abanyamakuru mbere yuko yakira ikipe ya Manchester United mu mukino uzabahuza kuri iki cyumweru, Wenger yateye urwenya ati: "Ubwo ibyo navuze naribeshye. Nsinshaka kongera kuvuga ku bijyanye n'ubuzima bwanjye bwite".

Uwufise ububasha kw’isanamu Opta
Image caption Ntibyoroshye ko Arsenal yarangiza ku mwanya wa kane

Muri shampiyona y'uyu mwaka, bamwe mu bafana b'ikipe ya Arsenal barigaragambije bamagana igihe kirekire Wenger amaze atoza ikipe ya Arsenal, bafite ibyapa byanditseho ngo "Wenger, jyenda!"

Gutsindwa na Tottenham

Gutsindwa ku cyumweru gishize n'ikipe y'abacyeba ya Tottenham byatumye Arsenal ubu iri ku mwanya wa gatandatu ku rutonde rwa shampiyona kandi ikaba ifite ibyago by'uko ishobora kunanirwa kubona na tike yo kuzakina Champions League.

Byaba bibaye ubwa mbere idakinnye iyo mikino mu myaka 20 ishize, kuko icyo gihe cyose yamye iri muri enye za mbere muri shampiyona.

Kuri ubu, Arsenal irarushwa amanota atandatu na Manchester City, nubwo bwose Arsenal igifite umukino w'ikirarane.

Kugira ngo Arsenal yizere kuzarangiza nibura mu myanya ine ya mbere muri shampiyona y'uyu mwaka, birasaba ko andi makipe ayiri imbere ubu yatsindwa mu mikino yayo ya shampiyona.