Jean Michel Seri yatsindiye igihembo cyitiriwe Marc-Vivien Foe

Jean Michael Seri abaye umukinnyi wa kabiri ukomoka muri Côte d'Ivoire utsindiye igihembo cyitiriwe Marc-Vivien Foe
Image caption Jean Michael Seri abaye umukinnyi wa kabiri ukomoka muri Côte d'Ivoire utsindiye igihembo cyitiriwe Marc-Vivien Foe

Umukinnyi Jean Michel Seri ukomoka muri Côte d'Ivoire akaba akina hagati mu ikipe ya Nice, yatowe nk'umukinnyi w'Umunyafurika witwaye neza cyane kurusha abandi muri shampiyona y'umupira w'amaguru mu Bufaransa izwi nka Ligue 1, ahita ashyikirizwa igihembo cyitiriwe Marc-Vivien Foe.

Jean Michel Seri y'imyaka makumyabiri n'itanu y'amavuko yatsindiye icyo gihembo nyuma yo kuza imbere ya Ryad Boudebouz ukomoka muri Algeria akaba akinira ikipe ya Montpellier, na Benjamin Moukandjo ukinira ikipe ya Lorient, akaba umukinnyi ukomoka muri Cameroon ndetse wari na kapiteni w'ikipe y'igihugu ya Cameroon iherutse gutwara igikombe cy'Afurika cy'ibihugu mu mupira w'amaguru.

Iki gihembo gitangwa buri mwaka mu rwego rwo kwibuka umukinnyi Foe wakomokaga muri Cameroon wapfuye ari mu kibuga mu mwaka wa 2003.

Jean Michel Seri abaye umukinnyi wa kabiri ukomoka mu gihugu cya Côte d'Ivoire utsindiye iki gihembo nyuma ya Gervinho wagitsindiye kabiri yikurikiranya mu mwaka wa 2010 n'uwa 2011.

Jean Michel Seri, umaze guhamagarwa inshuro 13 mu ikipe y'igihugu ya Côte d'Ivoire izwi nka Les Éléphants, yabaye umukinnyi w'ingenzi mu ikipe ya Nice muri uyu mwaka w'imikino. Yayitsindiye ibitego 6, atanga n'imipira 9 ku bakinnyi bagenzi be, byose byafashije Nice kurangiza shampiyona iri ku mwanya wa gatatu.

Seri yatangiye gukina umupira w'amaguru mu ikipe y'ikigugu y'iwabo ya ASEC Mimosas, nuko akomereza mu gihugu cya Portugal mu makipe ya FC Porto na Paços de Ferreira.

Yageze mu ikipe ya Nice mu kwezi kwa gatandatu mu mwaka wa 2005 nuko ayikinira mu mikino yose 38 ya shampiyona mu mwaka we wa mbere w'imikino, ayitsindira ibitego 3. Icyo gihe ikipe ya Nice yarangije shampiyona iri ku mwanya wa kane.

Yatangiye gukinira ikipe y'igihugu cye cya Côte d'Ivoire mu mikino mpuzamahanga ubwo yakinaga n'ikipe y'igihugu ya Sierra Leone mu kwezi kwa cyenda mu mwaka wa 2005.

Yanakiniye igihugu cye mu gikombe cy'Afurika cy'ibihugu giheruka cyabereye mu gihugu cya Gabon ubwo ikipe ya Côte d'Ivoire, yarisanganywe icyo gikombe, yasezerewe nabi cyane itarenze icyiciro cy'amajonjora.

Umukinnyi Sofiane Boufal ukomoka muri Maroc, watsindiye igihembo cyitiriwe Marc-Vivien Foe umwaka ushize, yakiniraga ikipe ya Lille mbere yuko yerekeza mu ikipe ya Southampton muri shampiyona y'icyiciro cya mbere mu mupira w'amaguru mu Bwongereza.

Urutonde rw'abandi bakinnyi batsindiye iki gihembo cyitiriwe Marc-Vivien Foe:

2016: Sofiane Boufal (Moroc/Lille)

2015: Andre Ayew (Ghana/Marseille)

2014: Vincent Enyeama (Nigeria/Lille)

2013: Pierre-Emerick Aubameyang (Gabon/Saint-Étienne)

2012: Younès Belhanda (Moroc/Montpellier)

2011: Gervinho (Côte d'Ivoire/Lille)

2010: Gervinho (Côte d'Ivoire/Lille)

2009: Marouane Chamakh (Moroc/Bordeaux)