Yaya Toure ashobora kongererwa amasezerano muri Manchester City

Uyu ni umwaka wa karindwi w'imikino Yaya Toure ak inira ku kibuga Etihad cy'ikipe ya Manchester City Uwufise ububasha kw’isanamu Getty Images
Image caption Uyu ni umwaka wa karindwi w'imikino Yaya Toure akinira ku kibuga Etihad cy'ikipe ya Manchester City

Amasezerano ya Toure w'imyaka 34 y'amavuko, ararangirana n'uyu mwaka w'imikino.

Toure yagaragaye nk'uwava muri iyi kipe nyuma yo gukurwa ku rutonde rw'abakinnyi b'ikipe ya Manchester City mu irushanwa rya Champions League.

Ndetse atangira guhabwa umwanya wo gukina muri shampiyona mu kwezi kwa cumi na kumwe, nyuma yo kumara igihe kinini adakina.

Ariko yarakoze cyane bituma umutoza Pep Guardiola yongera kumugirira icyizere ndetse intsinzi yo ku wa gatandatu, yari umukino we wa 29 muri uyu mwaka w'imikino.

Hagati aho, umutoza Guardiola yavuze ko umukinnyi Pablo Zabaleta ari "intyoza."

Ibi Guardiola abivuze nyuma yaho Zabaleta, ukomoka mu gihugu cya Argentine akaba akina mu ba kabiri mu ikipe ya Manchester City, ku wa gatandatu avuze ko azava muri iyi kipe mu mpera y'uyu mwaka w'imikino.

Bitandukanye na Zabaleta, uzava muri City nyuma yo kuyikinira imyaka icyenda, Toure afite amashyushyu yo gukomeza kuyikinira, mu gihe umutoza Guardiola yemeza ko Toure akwiye guhabwa andi masezerano.

City izasezera mu cyubahiro umukinnyi Zabaleta mu mukino wo ku wa kabiri n'ikipe ya West Brom, uzaba ari n'uwa nyuma ikiniye ku kibuga cyayo muri uyu mwaka w'imikino.