Umukino wa nyuma muri shampiyona y'Ubwongereza

Roberto Firmino Uwufise ububasha kw’isanamu Reuters
Image caption Liverpool yizeye ko umukinnyi wayo w'imbere Roberto Firmino wari waravunitse azabasha gukina ku cyumweru

Ku cyumweru tariki ya 21 z'ukwezi kwa gatanu niho shampiyona y'Ubwongereza mu mupira w'amaguru izarangira amakipe yose akaba azakina umukino wayo wa nyuma ku isaha ya 14:00GMT.

Mu gihe Chelsea yarangije gutwara igikombe cya shampiyona, amakipe ya Arsenal, Liverpool na Manchester City arahatanira imyanya ibiri isigaye kugirango azabone itike yo gukina mu irushanwa ry'igikombe cy'Uburayi.

Manchester City izerekeza ku kibuga cya Watford naho Liverpool yakire Middlesbrough.

Aya makipe yombi natsinda, Manchester City izarangiza shampiyona iri ku mwanya wa gatatu naho Liverpool irangize iri ku mwanya kane.

Ubwo yombi abe abonye itike yo kuzakina mu gikombe cy'Uburayi.

Ariko rero ikipe ya Arsenal - ubu iri ku mwanya wa gatanu - ishobora kuzitungura ikajya mu makipe ane ya mbere ku rutonde rwa shampiyona mu gihe Liverpool cyangwa se Manchester City imwe muri zo itakaje amanota hanyuma Arsenal nayo igatsinda umukino wayo na Everton ku kibuga cya Emirates.

Uwufise ububasha kw’isanamu Getty Images
Image caption Amakipe ya Manchester City, Liverpool na Arsenal ashobora gukina undi mukino shampiyona irangiye

None ubu ayo makipe yiteguye ate?

Arsenal na Everton

Aaron Ramsey yiteguye gukina ku ruhande rwa Arsenal nubwo bwose byabaye ngombwa ko asohoka mu kibuga kubera imvune mu mukino uheruka na Sunderland hagati mu cyumweru gishize.

Laurent Koscielny - ukina inyuma - ashobora kutaboneka kubera imvune mu gihe Alex Oxlade-Chamberlain nawe adashobora gukina kubera kuvunika.

Umutoza wa Everton we - Ronald Koeman - nta kibazo cy'imvune afite mu bakinnyi be.

Liverpool na Middlesbrough

Liverpool yizeye ko umukinnyi wayo w'imbere Roberto Firmino azaba ameze neza ku buryo yakina ku cyumweru nubwo afite ikibazo cy'imvune.

Aramutse atabonetse Liverpool yakinisha abakinnyi baherutse kunyagira West Ham ibitego 4-0.

Umutoza wa Middlesbrough - Steve Agnew - nawe ashobora kuba adafite Daniel Ayala, Gaston Ramirez na Victor Valdes kubera imvune.

Watford na Manchester City

Watford ishobora kuba idafite abakinnyi b'inyuma hagati bagera kuri batandatu mu gihe Adrian Mariappa na Miguel Britos bakize imvune bari mu gusuzumwa kugirango barebe niba biteguye gusubira gukina.

Sebastian Prodl we yarahagaritswe naho Christian Kabasele, Craig Cathcart na Younes Kaboul bafite imvune.

Kapiteni wa Manchester City - Vincent Kompany - we yagombye kuboneka nubwo bwose byabaye ngombwa ko asimbuzwa mu mukino batsinze West Brom 3-1.

John Stones nawe yakize imvune yari afite kandi ashobora gusimbura Nicolas Otamendi inyuma mu kibuga.

Aya makipe ariko ashobora no gukina undi mukino

Amakipe ya Manchester City, Liverpool na Arsenal birashoboka ko ashobora kongera guhura niba umukino wa nyuma ashigaje uterakanye neza amakipe azakina mu irushanwa ry'igikombe cy'Uburayi.

Aya makipe uko ari atatu, ari ku myanya ya gatatu, uwa kane n'uwa gatanu ku rutonde rwa shampiyona.

Atandukanijwe gusa n'amanota atatu mbere y'umukino wa nyuma wa shampiyona uteganijwe ku cyumweru.

Ariko ikinyuranyo kiri hagati y'ibitego yatsinze n'ibitego yatsinzwe kijya kungana ku buryo bishoboka rwose ko amakipe abiri ashobora kurangiza shampiyona ari ku mwanya wa gatatu cyangwa se uwa kane nta kintu na kimwe kiyatandukanya.

Bityo rero byaba ngombwa ko haba umukino uyahuza kugirango hamenyekane uko azakina mu marushanwa y'ibikombe by'Uburayi.