Arsenal ntizakina mu gikombe cy'Uburayi

iKIPE YA ARSENAL Uwufise ububasha kw’isanamu Empics

Ku munsi wa nyuma wa shampiyona y'Ubwongereza mu mupira w'amaguru, ikipe ya Arsenal amahirwe ntiyayisekeye kugirango ibashe kujya mu makipe ane ya mbere ku rutonde.

Nubwo bwose Arsenal yatsinze Everton 3-0, kugirango ibone itike yo gukina mu gikombe cy'Uburayi byari kuba ngombwa ko Manchester City yari ku mwanya wa gatatu na Liverpool yari ku mwanya wa kane bitsindwa cyangwa se Liverpool ikanganya.

Siko rero byagenze kubera ko Manchester City yanyangiye Watford 5-0 naho Liverpool itsinda bitayigoye Middlesbrough 3-0.

Bubaye ubwa mbere mu myaka 20 ishize, Arsenal inanirwa kubona itike yo gukina mu irushanwa ry'igikombe cy'Uburayi.

Ibi bikaba nta shiti bitashimije abafana b'iyi kipe bari bamenyereye kuyibona mu gikombe cy'Uburayi.

Ariko na none abakurikiranira hafi umupira w'amaguru baravuga ko bishobora gutuma iyi kipe yikubita agashyi.

Shampiyona y'uyu mwaka rero irangiye ikipe ya Chelsea ariyo yegukanye igikombe.

Ikurikiwe ku mwanya wa kabiri na Tottenham.

Ku mwanya wa gatatu haza Manchester City; Liverpool iri ku mwanya wa kane, Arsenal iri ku mwanya wa gatanu naho Manchester United iri ku mwanya wa gatandatu.

Ikipe ya Leicester City yegukanye igikombe cya shampiyona cy'umwaka ushize yo iri ku mwanya wa 12.

Amakipe ya Hull, Middlesbrough na Sunderland yamanutse mu kiciro cya kabiri.