Igitero cy'iterabwoba cy'i Manchester gitumye Chelsea ireka umutambagiro

Abakinnyi b'ikipe ya Chelsea bashyikirijwe igikombe cya shampiyona ku kibuga Stamford Bridge on Sunday ku cyumweru Uwufise ububasha kw’isanamu PA
Image caption Abakinnyi b'ikipe ya Chelsea bashyikirijwe igikombe cya shampiyona ku kibuga Stamford Bridge ku cyumweru

Ikipe ya Chelsea yaburijemo ibirori yateganyaga gukora ku cyumweru byo gutambagiza igikombe cya shampiyona yatsindiye uyu mwaka, nyuma y'igitero ku nzu y'imyidagaduro mu mujyi wa Manchester.

Ubuyobozi bw'ikipe ya Chelsea buravuga ko "bitaba bikwiye" mu gihe ubu mu Bwongereza ukwikanga ko haba igitero cy'iterabwoba biri ku kigero cyo hejuru cyane, kuva haba igitero cy'iterabwoba ku wa mbere kigahitana abantu 22.

Chelsea yateganyaga gutembereza igikombe cya shampiyona mu modoka idatwikiriye, ndetse yizeraga ko yashoboraga kuzongeraho n'igikombe cya FA mu gihe izakina na Arsenal ku wa gatandatu mu mukino wa nyuma w'igikombe cya FA.

Ubuyobozi bw'ikipe ya Arsenal nabwo bwavuze ko butazakora ibirori byo gutambagiza igikombe mu gihe Arsenal yaba itwaye FA.

Kwerekana umukino ku byuma bigaragaza amashusho y'umukino uri kuba ku kibuga Emirates cya Arsenal, nabyo byaburijwemo, kandi abafana bazasubizwa amafaranga bari batanze.

Chelsea yavuze ko abakinnyi bazatanga imfashanyo izagoboka abagizweho ingaruka n'igitero cy'iterabwoba. Ndetse abakinnyi bazambara ku kuboko udutambaro tw'ibara ry'umukara mu mukino wa nyuma wa FA uzabera i Wembley.

Itangazo ry'ikipe ya Chelsea riragira riti: "Umuntu wese ufite aho ahuriye n'ikipe ya Chelsea abikuye ku mutima yihanganishije abagizweho ingaruka n'igitero cy'iterabwoba cyo ku wa mbere i Manchester".

"Twifatanyije n'abahitanywe n'icyo gitero cy'iterabwoba, imiryango yabo n'inshuti zabo".

Ivan Gazidis, umuyobozi mukuru w'ikipe ya Arsenal, yavuze ko umutekano w'abafana n'abakozi ari ingenzi cyane kandi ko Arsenal iri gukorana bya hafi n'inzego zishinzwe umutekano.

Yagize ati: "Nyuma y'inama twagiriwe, byabaye ngombwa ko dufata umwanzuro wo kuterekana umukino ku byuma bigaragaza amashusho umukino uri kuba ndetse tureka no kuba twazakora umutambagiro".