Juventus 1-4 Real Madrid

Real Madrid yatwaye igikombe cya Champions League ku nshuro ya gatatu mu myaka ine Uwufise ububasha kw’isanamu Getty Images
Image caption Real Madrid yatwaye igikombe cya Champions League ku nshuro ya gatatu mu myaka ine

Cristiano Ronaldo yatsinze ibitego bibiri atuma Real Madrid itwara igikombe cya Champions League itsinze Juventus mu mujyi wa Cardiff.

Intsinzi ya Real Madrid yatwaye igikombe ku nshuro ya 12 mu mateka yayo, kikaba n'igikombe cya gatatu itwaye mu myaka ine, yagizwemo uruhare rukomeye na Cristiano ubu umaze gutsinda mu mikino itatu ya nyuma itandukanye ya Champions League.

Cristiano yafunguye amazamu atsindira Real ku mupira yari ahawe na Dani Carvajal ku munota wa 20, mbere y'uko Mario Mandzukic agombora ku ruhande rwa Juve ku gitego kimwe muri byiza byaranze amateka y'irushanzwa rya Champions League ku mukino wa nyuma.

Umunyezamu wa Keylor Navas ntacyo yari gukora ku ishoti ry'agatangaza.

Nyuma y'ikiruhuko, mu gice cya kabiri cy'umukino, Real yabate ntisukirwa yongera kwinjiza icya kabiri gitsinzwe na Casemiro mbere y'uko Cristiano atsinda icya gatatu ku ipasi ya Luka Modric.

Agahinda ka Juventus kakomejwe na Juan Cuadrado wahawe ikarita itukura akirukanwa mu kibuga nyuma yo kugongana na Sergio Ramos mbere y'uko Marci Asensio waje asimbura atsindira Real igitego cya kane umukino urangira ari 4-1.

Kuva yatangira gutoza, ubu umutoza wa Real Madrid Zinedine Zidane, afite agahigo ko gutwara Champions League inshuro ebyiri zikurikiranya byiyongera ku gikombe cya shampiyona La Liga.

Uwufise ububasha kw’isanamu Getty Images
Image caption Cristiano Ronaldo yazamuwe mu kirere n'abakinnyi bagenzi be nyuma y'uko afashije Real Madrid gutwara igikombe

Uyu wari umukino Real yagaragarijemo ubuhangage bwayo ku ikipe ya Juventus ifatwa nk'ifite abakinnyi b'inyuma bakomeye ku isi itaraninjijwe igitego na kimwe mu cyiciro cya kimwe cya kane mu mukino yatsinze Barcelona, ikabuza Lionel Messi, Neymar na Suarez gutsinda.

Uwufise ububasha kw’isanamu Getty Images
Image caption Gareth Bale, wari waje ava mu mvune y'imfundiko yakinnye asimbuye ku munota wa 77 yazamuye igikombe cya Champions League nyuma y'umukino mu mujyi avukamo wa Cardiff

Juve yari yashoboye kugaruka mu mukino nyuma y'igitego gitangaje cya Mandzukic cyatumye amakipe ajya mu karuhuko anganya 1-1 ariko yaje kuzimira mu gice cya kabiri.

Uwufise ububasha kw’isanamu EPA/AFP and Getty Images
Image caption Mario Mandzukic yatsinze igitego gitangaje cyatumye Juve inganya 1-1 mu gice cya mbere

Umukinnyi mwiza w'umukino: Cristiano Ronaldo (Real Madrid)

Hakurikiyeho iki?

Real Madrid izakina na Manchester United yatwaye igikombe cya Europa League mu mukino w'igikombe cya Uefa Super Cup ( saa 19:45 ku isaha yo mu Bwongereza) mu mujyi wa Skopje, Macedonia, ku itariki ya 8/08/2017.