Antoine Griezmann yongereye amasezerano muri Atletico Madrid

Griezmann yageze muri Atletico Madrid avuye muri Real Sociedad mu cyi ryo mu mwaka wa 2014 Uwufise ububasha kw’isanamu Getty Images
Image caption Griezmann yageze muri Atletico Madrid avuye muri Real Sociedad mu cyi ryo mu mwaka wa 2014

Rutahizamu Griezmann w'imyaka 26 y'amavuko, byavugwaga cyane ko yakwerekeza muri Manchester United, ndetse mu kwezi gushize yavuze ko hari amahirwe angana na "6/10" ko kuri iri cyi yakwerekeza i Old Trafford.

Ariko yemeye kuguma muri Atletico nyuma yaho iyi kipe igumirishijweho icyemezo kibuza igurishwa ry'abakinnyi.

Yagize ati: "Ikintu cya mbere nshaka gukora ni ukwisegura ku bantu bumvise nabi ibyo natangaje".

"Kuva nagera hano, nakoreye icyo nshoboye cyose ikipe yanjye, bagenzi banjye dukinana ndetse n'itsinda ry'abatoza".

Ikipe ya Atletico ntishobora gusinyisha undi mukinnyi kugeza mu kwezi kwa mbere.

Ni nyuma yaho itsindiwe mu bujurire bw'ikomanyirizwa mu kwezi kwa karindwi kwa 2016, kubera kurenga ku mategeko y'ishyirahamwe ry'umupira w'amaguru ku isi, FIFA, abuza amakipe gusinyisha abakinnyi b'abana.

Griezmann, umaze gukina inshuro 41, yatsinze ibitego 26 mu mwaka w'imikino wa 2016-2017 igihe Atletico yasozaga iri ku mwanya wa gatatu muri shampiyona ya La Liga, iri inyuma ya Real Madrid na Barcelona.

Yatowe nk'umukinnyi wa gatatu w'intyoza ku isi mu kwezi kwa mbere, inyuma ya Cristiano Ronaldo na Lionel Messi, mu muhango wo gutanga umupira wa zahabu uhabwa umukinnyi wahize abandi ku isi mu mupira w'amaguru.

Griezmann, wanakiniye igihugu cye cy'Ubufaransa gitsindwa na Suwede 2 kuri 1 ku wa gatanu mu mikino y'amajonjora y'igikombe cy'isi, ari ku rutonde rw'abakinnyi b'Ubufaransa baza gukina n'Ubwongereza mu mukino wa gicuti kuri uyu wa kabiri.