Umurambo wa Cheick Tiote woherejwe iwabo muri Côte d'Ivoire

Kuri uyu wa kane, umufana wo muri Côte d'Ivoire yagaragaye afite igishushanyo kiriho amagambo asezera kuri Cheick Tiote
Image caption Kuri uyu wa kane, umufana wo muri Côte d'Ivoire yagaragaye afite igishushanyo kiriho amagambo asezera kuri Cheick Tiote

Tiote yari mu ikipe ya Côte d'Ivoire yatwaye igikombe cy'Afurika cy'ibihugu mu mupira w'amaguru mu mwaka wa 2015. Mu cyumweru gishize nibwo yaguye mu kibuga ahita apfa ari mu myitozo mu ikipe ya Beijing Enterprises.

Ku wa kabiri habaye umuhango wo gusezera umurambo we mu murwa mukuru w'Ubushinwa, Beijing, witabirwa n'abo mu muryango we, inshuti ze n'abo bakinanaga.

BBC yamenye ko umuryango wa Tiote ushaka ko ashyingurwa mu mujyi avukamo wa Yamoussoukro ariko ishyirahamwe ry'umupira w'amaguru muri Côte d'Ivoire ryo rikaba rishaka ko ashyingurwa mu murwa mukuru Abidjan.

Kuri uyu wa kane, abantu babarirwa mu magana, barimo na Hervé Renard wigeze gutoza ikipe ya Côte d'Ivoire, bari bari ku kibuga mpuzamahanga cy'indege cy'i Abidjan bategereje kwakira umurambo wa Tiote.

Kolo Toure, Gervinho na Siake Tiene nabo bari bari muri iyo mbaga.

Toure yavuze ko Tiote, wigeze no gukina hagati mu ikipe ya Newscastle United yo mu Bwongereza, yari "umukinnyi ukomeye, ugira ishyaka rwinshi". Yongeyeho ko yababajwe no kumva inkuru y'urupfu rwa Tiote ku myaka 30 y'amavuko.

Image caption Abakinnyi ba Côte d'Ivoire barimo na Gervinho (wambaye umupira w'umweru) bateruye umurambo wa Tiote ugeze ku kibuga cy'indege cy'i Abidjan