Cristiano Ronaldo "arashaka kuva" muri Real Madrid

Cristiano Ronaldo amaze imyaka umunani akinira ikipe ya Real Madrid Uwufise ububasha kw’isanamu Getty Images
Image caption Cristiano Ronaldo amaze imyaka umunani akinira ikipe ya Real Madrid

BBC yabwiwe n'inshuti ya hafi cyane ya Cristiano Ronaldo ko uyu mukinnyi "ababaye" kandi "yataye umutwe" nyuma yo kuregwa uburiganya mu kuriha imisoro, bityo akaba ashaka kuva muri Real Madrid.

Abashijacyaha b'Abanyespanye bashinja Ronaldo w'imyaka 32 y'amavuko ko yakoze uburiganya ntarihe ubuyobozi amafaranga y'imisoro abarirwa muri za miliyoni z'ama euro akoreshwa ku mugabane w'Uburayi.

Ronaldo ahakana ibyo birego.

Inshuti ya hafi cyane ya Ronaldo yabwiye BBC iti:

"Yumva ko ari umunyakuri, yitwara neza ndetse yakoze ibintu byose neza. Rero ntabwo abyiyumvisha".

"Arababaye cyane kandi rwose yataye umutwe".

Iyo nshuti ye ya hafi cyane yongeyeho iti: "Ntashaka kuguma muri Espanye. Kuri ubu, arashaka kugenda".

Mu kwezi kwa cumi na kumwe kwa 2016, Ronaldo - wageze muri Real avuye muri Manchester United aguzwe miliyoni 80 z'amapawundi mu mwaka wa 2009 - yasinye kontaro y'imyaka itanu yo gukomeza gukinira Real Madrid.

Ubushinwa bushobora kuba hamwe mu ho yakwerekeza ariko abajyanama b'uyu mukinnyi ukomoka mu gihugu cya Portugal bakwifuza ko aguma ku mugabane w'Uburayi.

Bigashoboka cyane ko yakwerekeza mu ikipe ya Paris St-Germain yo mu Bufaransa cyangwa agasubira muri shampiyona ya Premier League mu gihugu cy'Ubwongereza.

Ronaldo yafashije ikipe ya Real gutwara igikombe cya Champions League inshuro eshatu ndetse n'igikombe cya shampiyona ya Espanye, La Liga, inshuro ebyiri.

Ashinjwa kutariha imisoro ingana na miliyoni zirenga 14 z'ama euro, hagati y'umwaka wa 2011 n'uwa 2014.

Ikipe ya Real Madrid yasohoye itangazo ivuga ko ifite "icyizere cyose" ku mukinnyi wayo, kandi ko Real yizeye ko azagaragaza ko ari umwere.

Mu mwaka w'imikino 2016-2017, Ronaldo yafashije Real gutwara igikombe cya shampiyona ya Espanye ku nshuro ya mbere kuva mu mwaka wa 2012 ndetse Real yisubiza n'igikombe cya Champions League.

Mu mwaka wa 2008, Ronaldo yanafashije Manchester United gutwara igikombe cya Champions League.

Afite umuhigo wo gutsinda ibitego 105 mu irushanwa rya Champions League, akaba arusha ibitego 11 Lionel Messi w'ikipe ya Barcelona umugwa mu ntege.