Andy Murray asigaranye "imyaka nk'ibiri" ayoboye muri tenisi

Andy Murray afite intego yo gutwara Wimbledon ku nshuro ya gatatu akagera ku muhigo ufitwe na Fred Perry Uwufise ububasha kw’isanamu Getty Images
Image caption Andy Murray afite intego yo gutwara Wimbledon ku nshuro ya gatatu akagera ku muhigo ufitwe na Fred Perry

Murray w'imyaka 30 y'amavuko afite intego yo gutwara ku nshuro ya gatatu irushanwa rya Wimbledon rizatangira mu kwezi gutaha.

Nabigeraho, azaba ageze ku muhigo usanzwe ufitwe n'undi Mwongereza Fred Perry.

Mu kiganiro na BBC, Murray yavuze ko nubwo hari abakinnyi ba tenisi bakomeje gukina tenisi ku rwego rwo hejuru bari mu myaka 30 y'amavuko, we yemeye ko nta gihe kirekire asigaje ari ku mwanya wa mbere.

Yagize ati: "Umutoza wanjye, Ivan Lendl, yakomeje gukina ari ku rwego rwo hejuru afite hafi imyaka 32 y'amavuko".

"Ariko, muri rusange, mu myaka nka 20 cyangwa 30 ishize, ubusanzwe mu ntangiriro y'imyaka 30 y'amavuko nibwo abakinnyi batangira kugorwa no kuguma ku rwego rwo hejuru".

Yongeyeho ati: "Nzi abakinnyi bamwe na bamwe bakomeje kwitwara neza cyane kandi bafite hagati mu myaka 30 y'amavuko, ariko birashoboka cyane ko jye bitazanshobokera".

Ati: "Wenda imyaka nk'ibiri iri imbere izaba iri muri micye nsigaranye yo gukina amarushanwa akomeye cyane".

Irushanwa rya Wimbledon ry'uyu mwaka rizatangira ku itariki 3 z'ukwezi kwa karindwi. Murray yatsinze irushanwa nk'iri mu mwaka wa 2013 n'uwa 2016.

Aravuga ko n'uyu mwaka afite icyizere cyinshi ko ashobora kuritwara.