Nyuma yo gutsindwa kwa Portugal, Cristiano yemeje ko ari se w'impanga

Biravugwa ko Ronaldo yavuye ahacumbitse ikipe ya Portugal agahita ajya kureba abana be b'impanga Uwufise ububasha kw’isanamu EPA
Image caption Biravugwa ko Ronaldo yavuye ahacumbitse ikipe ya Portugal agahita ajya kureba abana be b'impanga

Hari hashize iminsi ibitangazamakuru byo mu gihugu cya Portugal bitangaje ko abana b'impanga be bavutse hakoreshejwe uburyo bwa gihanga bwo gutwitwa n'umubyeyi utari mama wabo, muri Leta Zunze Ubumwe z'Amerika.

Ariko nyuma gusa yaho ikipe ya Portugal isezerewe n'ikipe y'igihugu ya Chili, nibwo Cristiano yemeje ayo makuru y'ivuka ry'abo bana.

Abinyujije ku rubuga nkoranyambanga rwa Facebook, Cristiano yagize ati:

"Ndishimye cyane, kera kabaye, kuba bwa mbere ndi kumwe n'abana banjye".

Asanzwe afite umwana w'umuhungu, Cristiano Ronaldo Junior, wavutse mu kwezi kwa gatandatu mu mwaka wa 2010.

Cristiano Ronaldo "arashaka kuva" muri Real Madrid

Uyu rutahizamu w'ikipe ya Real Madrid yatangiye ubutumwa bwe avuga ko yifatanyije n'ikipe y'igihugu n'"umutima wose" nubwo bwose havutse impanga ze, yongeraho ko "ku bw'amahirwe macye ntitwashoboye kugera ku ntsinzi".

Umukino wa kimwe cya kabiri wabereye mu mujyi wa Kazan, warangiye ari ubusa ku busa hagati ya Chili na Portugal, nuko ikipe ya Portugal isezererwa abakinnyi bayo bahushije penaliti eshatu.

Nta yandi makuru menshi azwi kuri aba bana b'impanga, usibye kuba amakuru ataremezwa aturuka muri Portugal yavuze ko bavutse ku itariki 8 z'uku kwezi kwa gatandatu, mbere cyane yuko hatangira imikino y'igikombe cy'ibihugu.

Televiziyo SIC yatangaje ko izi mpanga - umuhungu n'umukobwa - bahawe amazina ya Eva na Mateo.

Andi makuru avuga ko Dolores Aveiro, nyina wa Cristiano, yagiye muri Leta Zunze Ubumwe z'Amerika nyuma y'ivuka ry'abo bana b'impanga.

Ronaldo yatsindiye agashimwe ka FIFA

Itangazo ry'ishyirahamwe ry'umupira w'amaguru muri Portugal, ryavuze ko Ronaldo yarimenyesheje iby'ivuka ry'abo bana mbere yuko haba imikino y'igikombe cy'ibihugu.

Ariko ahitamo kujyana n'ikipe ya Portugal mu Burusiya, mu cyo iri shyirahamwe ryise "igikorwa tugomba kuzirikana tukanashima".

Uwufise ububasha kw’isanamu EPA
Image caption Cristiano Ronaldo yagaragaye n'umukobwa w'inshuti ye, Georgina Rodriguez, n'umuhungu wabo Cristiano Ronaldo Jr, nyuma yaho ikipe ya Real Madrid yegukanye irushanwa rya Champions League mu ntangiriro y'uku kwezi

Aho kugira ngo agumane n'ikipe y'igihugu ya Portugal mu mukino wo guhatanira umwanya wa gatatu ku cyumweru, iryo tangazo ryongeyeho ko Ronaldo agiye kuva ahacumbitse ikipe ya Portugal.

Ishyirahamwe ry'umupira w'amaguru muri Portugal ryagize riti: "Tugomba kureka umukinnyi kugira ngo kera kabaye amenyane n'abana be".

Mu gitondo cyo kuri uyu wa kane nibwo Ronaldo, umaze igihe kinini akundana n'umunyamideli Georgina Rodríguez, yavuye mu mujyi wa Kazan agasiga bagenzi be bakinana mu ikipe ya Portugal.