Lionel Messi arakora ubukwe

Lionel Messi yasanzwe mu kibuga na Antonella Roccuzzo n'abana babo babiri b'abahungu Uwufise ububasha kw’isanamu AFP / Getty Images
Image caption Lionel Messi yasanzwe mu kibuga na Antonella Roccuzzo n'abana babo babiri b'abahungu

Uyu mukinnyi w'ikipe ya Barcelona arasubira mu mujyi wa Rosario yavukiyemo mu gihugu cya Argentina, gukora ubukwe na Antonella Roccuzzo.

Bamenyanye mbere yuko Messi yimukira mu gihugu cya Espanye afite imyaka 13 y'amavuko.

Ikinyamakuru Clarín cyandikirwa muri Argentina cyanditse ko ubu ari "ubukwe bw'umwaka" ndetse ngo ni "ubukwe bw'ingenzi muri iki kinyejana".

Benshi mu bakinnyi bakinana na Messi, barimo Luis Suárez na Neymar, bari mu batumire 260 baza kwitabira ubu bukwe.

Benshi babwitabiriye bakoresheje indege zabo bwite.

Abapolisi b'inyongera baraza kwitabazwa nabo mu gucunga umutekano muri hoteli yakira abashyitsi. Kompanyi yigenga icunga umutekano yo irakorera imbere muri hoteli, ikumira abashobora kuza kandi batatumiwe.

Abashinzwe gutegura ubu bukwe bavuze ko abanyamakuru barenga 150 bahawe uruhushya rwo kwinjira ahantu habugenewe bateguriwe gutarira amakuru, ariko ntibemerewe kugera ahantu hose ubukwe bubera.

Umukwe n'umugeni bamenyanye gute?

Uwufise ububasha kw’isanamu AFP / Getty Images
Image caption Umunyabugeni Lisandro Urteaga yasize irangi urukuta ashushanya Messi mu mujyi wa Rosario mu rwego rwo kwizihiza ubukwe bwe

Messi w'imyaka 30 y'amavuko, yamenyanye n'uwo bakorana ubukwe none, igihe Messi yari afite gusa imyaka itanu y'amavuko.

Uwo bagiye gukorana ubukwe ni mubyara w'inshuti ye magara, Lucas Scaglia, na we wabaye umukinnyi w'umupira w'amaguru wabigize umwuga.

Messi yemeye gukinira Barcelona afite imyaka 13 y'amavuko, abyemera asaba ko gusa ubuyobozi bw'ikipe ya Barcelona bumuvuza ku kibazo yari afite kijyanye no kutagira ibituma umuntu akura bihagije mu mubiri we.

Messi yavuze ko byamugoye gusiga abo mu muryango we n'abo akunda akajya gukina muri Espanye, ndetse no kuva mu kipe yakiniraga.

Ubu bombi baba mu mujyi wa Barcelona, bakaba bafite abana babiri b'abahungu.

Roccuzzo w'imyaka 29 y'amavuko ukorana ubukwe na Messi uyu munsi, biteganyijwe ko yambara ikanzu yadozwe na Rosa Clara, umunyamideli uba i Barcelona.

Uyu munyamideli yanambitse abandi bantu bakomeye nk'umukinnyi wa filimi Eva Longoria n'umwamikazi wa Espanye, Letizia.

Kuva Messi yagera muri Espanye, afite agahigo ko kuba amaze gutsindira inshuro eshanu umupira wa zahabu utangwa n'ishyirahamwe ry'umupira w'amaguru ku isi, Fifa, igihembo gihabwa umukinnyi wahize abandi ku isi mu mupira w'amaguru.