Wimbledon 2017: Garbine Muguruza yasezereye Angelique Kerber

Mu mwaka wa 2016, Angelique Kerber yatsindiye Grand Slam ebyiri - Australian Open na US Open
Image caption Mu mwaka wa 2016, Angelique Kerber yatsindiye Grand Slam ebyiri - Australian Open na US Open

Muguruza uri ku mwanya wa 14 ku isi mu mukino wa tenisi mu bagore, yatsinze nimero ya mbere Kerber ku maseti 4-6 6-4 6-4 mu mukino wamaze amasaha abiri n'iminota 20.

Kerber watsinze iri rushanwa mu mwaka wa 2016, yarakeneye kugera ku mukino wa nyuma uzaba ku wa gatandatu kugira ngo yizere kuguma ku mwanya wa mbere ku isi.

Muguruza w'imyaka 23 y'amavuko, azakina n'Umurusiyakazi Svetlana Kuznetsova mu mikino ya kimwe cya kane.

Muguruza wakinanaga imbaraga nyinshi cyane, yatewe ishyaka ryo gusatira n'umutoza we Conchita Martinez, Umunyespanyekazi watsindiye irushanwa rya Wimbledon mu mwaka wa 1994.

Kugeza n'ubu, uyu mutoza wa Muguruza ni we Munyespanyekazi watsindiye Wimbledon.

Ukwihagararaho kwa Kerber kwarangiriye mu iseti ya nyuma y'ishiraniro yari iyo kubakiranura.

Uyu Mudagekazi w'imyaka 29 y'amavuko nanone yatsindiwe aha umwaka ushize ku mukino wa nyuma.

Kerber yatsinze abiri mu marushanwa ane ya Grand Slam mu mwaka wa 2016. Ariko ntiyashoboye kugera muri kimwe cya kane mu marushanwa atatu ya Grand Slam yakinnye muri uyu mwaka wa 2017.

Azasimburwa ku mwanya wa mbere ku isi n'Umunyaromaniyakazi Simona Halep w'imyaka 25 y'amavuko [uzakina n'Umunyabelarusiyakazi Victoria Azarenka mu mikino ya kimwe cy'umunani], naba ashoboye kugera muri kimwe cya kabiri.

Niba Halep adashoboye kugera mu mikino ya kimwe cya kabiri, Karolina Pliskova w'imyaka 25 y'amavuko ukomoka muri Repubulika ya Czech, ni we wahita ajya ku mwanya wa mbere ku isi muri tenisi mu bagore.

Nubwo bwose yamaze gusezererwa mu irushanwa Wimbledon ry'uyu mwaka.