Romero yongerewe kontaro muri Manchester United

Sergio Romero nta gitego yinjijwe mu mikino itanu muri itandatu yakinnye muri Premier League Uwufise ububasha kw’isanamu Reuters
Image caption Sergio Romero nta gitego yinjijwe mu mikino itanu muri itandatu yakinnye muri Premier League

Romero w'imyaka 30 y'amavuko, yageze mu ikipe ya Manchester United mu mwaka wa 2015. Yari avuye mu ikipe ya Sampdoria yo mu Butaliyani.

Uyu munyezamu ubanzamo mu ikipe y'igihugu ya Argentina, yakinnye umukino wa nyuma w'igikombe cy'isi mu mupira w'amaguru mu mwaka wa 2014.

Yanakinnye mu mikino wa nyuma y'igikombe cya Copa America mu myaka ya 2015 na 2016 aho Argentina yatsinzwe na Chili.

Mu kwezi kwa gatanu, Romero yatoranyijwe mu kigwi cya David de Gea ubwo Manchester United yatsindaga Ajax ku mukino wa nyuma w'igikombe cya Europa League.

Mu myaka ibiri amaze akinira Manchester United, Romero yakinnye imikino 28, nubwo bwose itandatu yonyine ari yo yakinnye muri shampiyona ya Premier League.

Kongererwa kontaro kwa Romero kubaye mu gihe hari guhwihwiswa ko De Gea, umuzamu ubanzamo muri Manchester United, ashobora kwerekeza mu ikipe ya Real Madrid.