Senegali: Ikipe y'umupira w'amaguru ya Ouakam yahagaritswe

Byabereye kuri sitade ya Demba Diop mu murwa mukuru Dakar Uwufise ububasha kw’isanamu ARWA BARKALLAH
Image caption Byabereye kuri sitade ya Demba Diop mu murwa mukuru Dakar

Ishyirahamwe ry'umupira w'amaguru muri Senegali ryahagaritse ikipe y'umupira w'amaguru ya US Ouakam nyuma yaho umubyigano uhitanye abafana umunani ku kibuga.

Abandi bafana bagera ku 100 nabo bakomerekeye mu mubyigano mu gihe abafana ba Ouakam bashyamiranaga n'ikipe ya Stade de Mbour mu mukino wa nyuma wa shampiyona wabaye ku wa gatandatu.

Itangazo ry'ishyirahamwe rw'umupira w'amaguru muri Senegali rivuga ko ikipe ya Ouakam yabaye ihagaritswe.

Iryo tangazo ryongeyeho ko mu gihe cya vuba, akanama gashinzwe imyitwarire mu ishyirahamwe ry'umupira w'amaguru muri Senegali kazafata umwanzuro ku bihano ikipe ya Ouakam izahabwa.

Ibiro ntaramakuru AFP bitangaza ko benshi mu babibonye babonye abafana ba Ouakam batera amabuye n'ibindi bintu abafana b'ikipe ya Mbour.

Ibi byabaye mu gihe iyi kipe ya Mbour yari yasuye Ouakam yari imaze gutsinda ibitego 2 kuri 1 mu gihe cy'inyongera.

Ikipe ya US Ouakam, yatwaye igikombe cya shampiyona mu mwaka wa 2011, ni iyo mu murwa mukuru wa Senegali, Dakar. Stade de Mbour yo ni yo mu majyepfo, ku birometero 80 uvuye i Dakar.

Ku cyumweru, leta ya Senegali yatangaje ko hagiye gukorwa iperereza kuri ayo mahano yabaye. Hagati aho, leta yabaye ihagaritse ibikorwa byose by'imikino n'umuco kugeza amatora ya politiki abaye mu mpera y'uku kwezi.