Wakaso yasinye kontaro mu ikipe ya Alaves

Alaves ibaye ikipe ya gatandatu muri Espanye Mubarak Wakaso akiniye
Image caption Alaves ibaye ikipe ya gatandatu muri Espanye Mubarak Wakaso akiniye

Mubarak Wakaso, umukinnyi mpuzamahanga w'umupira w'amaguru w'Umunyaghana, yasinye kontaro y'imyaka itatu mu ikipe ya Alaves muri shampiyona y'icyiciro cya mbere muri Espanye, La Liga.

Wakaso w'imyaka 26 y'amavuko, agiye gukinira Alaves avuye mu ikipe ya Panathinaikos yo mu Bugereki.

Uyu mukinnyi wo hagati amenyereye gukina muri Espanye: yigeze gukinira Granada, Las Palmas, Espanyol, Villareal na Elche.

Wakaso yakiniye ikipe y'igihugu ya Ghana, Black Stars, kuva mu mwaka wa 2012. Kandi yanakinnye imikino itanu mu mikino y'igikombe cy'Afurika cy'ibihugu cy'uyu mwaka.

Mu itangazo, ikipe ya Alaves yagize iti: "Deportivo Alaves irashaka guha ikaze Wakaso kandi imwifurije ishya n'ihirwe kuri iyi ntambwe nshya".

Wakaso yanakinnye mu Burusiya mu ikipe ya Rubin Kazan, no muri Scotland, mu ikipe ya Celtic ifite igikombe cya shampiyona y'uyu mwaka.