Imikino y'Uburayi 2017: Abadagekazi basezereye Abataliyanikazi

Abadagekazi bamaze gutwara igikombe cy'Uburayi inshuro esheshatu Uwufise ububasha kw’isanamu Getty Images
Image caption Abadagekazi bamaze gutwara igikombe cy'Uburayi inshuro esheshatu

Mu mikino y'Uburayi ya 2017 y'umupira w'amaguru mu bagore, Ubudage bufite igikombe gishize bwasezereye Ubutaliyani, mu gihe Suwede yatsinze Uburusiya.

Ubudage bwatsinze ibitego 2 kuri 1 cy'Ubutaliyani mu majonjora y'imikino y'Uburayi y'umupira w'amaguru mu bagore y'uyu mwaka wa 2017.

Ubutaliyani bwatsinze icyo gitego kimwe binyuze kuri rutahizamu Ilaria Mauro, wishyuraga icyo Josephine Henning yari yatsindiye ikipe ye y'Ubudage mu gice cya mbere cy'umukino.

Nyuma Babett Peter yatsinze igitego cya kabiri cy'intsinzi y'Ubudage, kivuye kuri penaliti. Biturutse ku ikosa umunyezamu Laura Giuliani w'Ubutaliyani yari akoze agusha Anja Mittag.

Nyuma y'umunota umwe, Elisa Bartoli w'Ubutaliyani yasohowe mu kibuga amaze kwerekwa ikarita ya kabiri y'umuhondo.

Hagati aho mu wundi mukino, Suwede yatsinze Uburusiya ibitego 2 ku busa, ihita iyobora ityo itsinda B.

Ibitego bya Suwede byatsinzwe na kapiteni Lotta Schelin ku munota wa 22 w'umukino, winjije n'umutwe umupira wari utewe na mugenzi we Magdalena Ericsson.

Stina Blackstenius ashyiramo icya kabiri mu gice cya kabiri cy'umukino, giturutse ku mupira wari urenguwe nabi na myugariro w'Uburusiya, Anna Kozhnikova.

Suwede n'Ubudage zanganyije ubusa ku busa mu mukino ufungura irushanwa. Buri imwe irasabwa nibura inota rimwe mu mikino ya nyuma y'amatsinda izaba ku wa kabiri, kugira ngo zikatishe tike y'imikino ya kimwe cya kane cy'irangiza.

Uburusiya bwo burasabwa gutsinda Ubudage kugira ngo bugere muri kimwe cya kane cy'iyi mikino iri kubera mu Buholandi.