Umutoza wa Barcelona: "Turashaka ko Neymar aguma hano"

Neymar yatsinze ibitego 13 mu mwaka ushize w'imikino ubwo ikipe ye ya Barcelona yasozaga shampiyona iri ku mwanya wa kabiri inyuma ya Real Madrid Uwufise ububasha kw’isanamu AFP
Image caption Neymar yatsinze ibitego 13 mu mwaka ushize w'imikino ubwo ikipe ye ya Barcelona yasozaga shampiyona iri ku mwanya wa kabiri inyuma ya Real Madrid

Umutoza Ernesto Valverde w'ikipe ya FC Barcelona aramagana amakuru yuko Neymar ashobora kwerekeza mu ikipe ya PSG.

Umutoza Ernesto Valverde yongeye gushimangira ubushake bwe bwo kugumana umukinnyi Neymar mu ikipe ya Barcelona nyuma y'umukino wa gicuti n'ikipe ya Juventus.

Ni umukino warangiye ku ntsinzi y'ibitego 2 bya Barcelona kuri 1 cya Juventus, ibitego bya Barcelona byombi bikaba byinjijwe na Neymar.

Amakuru aravuga ko ikipe ya Paris St-Germain yaba yatangiye kwiga ku masezerano afite agaciro ka miliyoni 199 z'amapawundi ajyanye n'igihe Neymar yaba ashatse kuva muri Barcelona.

Ariko Josep Maria Bartomeu, perezida w'ikipe ya Barcelona, yabwiye BBC ko Neymar, Umunyabrezili w'imyaka 25 y'amavuko, atagurishwa.

Neymar ntabwo yaganiriye n'abanyamakuru nyuma y'iyo ntsinzi mu mukino ubanziriza shampiyona wabereye i New Jersey, muri Leta Zunze Ubumwe z'Amerika.

Ahubwo umutoza Valverde ni we wagize icyo atangaza kuri ayo makuru adafite gihamya.

Yagize ati: "Turashaka Neymar hamwe natwe. Tuzi agaciro ke mu kibuga ndetse n'umwuka mwiza azana muri bagenzi be".

Neymar yageze mu ikipe ya FC Barcelona mu mwaka wa 2013 avuye mu ikipe ya Santos y'iwabo muri Brezili. Yasinye kontaro nshya y'imyaka itanu yo gukinira Barcelona kugeza mu kwezi kwa cumi mu mwaka wa 2021.