Namibia yasezereye Zimbabwe mu majonjora yo kwitabira CHAN

Amakipe 15 azaba ari kumwe na Kenya izakira imikino ya CHAN 2018 azamenyekana mu kwezi gutaha kwa munani
Image caption Amakipe 15 azaba ari kumwe na Kenya izakira imikino ya CHAN 2018 azamenyekana mu kwezi gutaha kwa munani

Ikipe ya Namibia y'umupira w'amaguru yasezereye ikipe ya Zimbabwe mu majonjora yo kwitabira imikino y'irushanwa rya CHAN ryo mu mwaka wa 2018.

Shampiyona y'umupira w'amaguru muri Namibia yari imaze umwaka urenga itaba.

Namibia yatsinze kuri penaliti 5 kuri 4 za Zimbabwe nyuma yuko ku nshuro zombi aya makipe yahuye anganyije igiteranyo cy'igitego 1 kuri 1.

Mu byumweru bibiri bishize, ikipe ya Zimbabwe yashimagijwe nk'intwari nyuma yo kwegukana igikombe cy'irushanwa rya COSAFA rihuza ibihugu byo mu majyepfo y'Afurika.

Irushanwa rya CHAN rihuza amakipe agizwe n'abakinnyi bakina muri shampiyona zo mu bihugu by'iwabo ku mugabane w'Afurika.