Djene yerekeje mu ikipe ya Getafe

Djene yigeze gukina muri Espanye, akina mu ikipe ya Alcorcon yo mu cyiciro cya kabiri kuva mu mwaka wa 2014 kugera mu wa 2016
Image caption Djene yigeze gukina muri Espanye, akina mu ikipe ya Alcorcon yo mu cyiciro cya kabiri kuva mu mwaka wa 2014 kugera mu wa 2016

Djene Dakonam Ortega, umukinnyi mpuzamahanga w'Umunyatogo, yerekeje mu ikipe ya Getafe yo mu cyiciro cya mbere muri Espanye. Yasinye kontaro yo kuyikinira mu gihe cy'imyaka ine.

Myugariro Djene w'imyaka 25 y'amavuko, yakiniraga ikipe ya Sint-Truidense yo mu gihugu cy'Ububiligi.

Bubaye ubwa kabiri Djene agiye gukina muri Espanye nyuma yo gukinira ikipe ya Alcorcon yo mu cyiciro cya kabiri, kuva mu mwaka wa 2014 kugera mu wa 2016.

Mu mwaka wa 2013, Djene yakinnye imikino yose ubwo ikipe y'igihugu cye cya Togo, bwa mbere mu mateka yayo, yageraga muri kimwe cya kane cy'imikino y'igikombe cy'Afurika cy'ibihugu.

Kuva yatangira gukina mu ikipe y'igihugu ya Togo mu mwaka wa 2012, Djene amaze gukinira iki gihugu cyo mu burengerazuba bw'Afurika inshuro zirenga 30.

Ikipe ya Getafe yari yamanutse mu cyiciro cya kabiri mu mwaka wa 2016, yongeye kuzamuka mu cyiciro cya mbere cya shampiyona ya Espanye, La Liga, mu mwaka ushize w'imikino.