Newcastle United yaguze Mikel Merino wa Borussia Dortmund

Merino (iburyo) yakiniye inshuro 6 ikipe y'igihugu ya Espanye y'abatarengeje imyaka 21 y'amavuko, ayitsindira igitego 1 Uwufise ububasha kw’isanamu Getty Images
Image caption Merino (iburyo) yakiniye inshuro 6 ikipe y'igihugu ya Espanye y'abatarengeje imyaka 21 y'amavuko, ayitsindira igitego 1

Ikipe ya Newcastle United yaguze mu buryo bw'inguzanyo Mikel Merino, umukinnyi wo hagati w'Umunyespanye wakiniraga ikipe ya Borussia Dortmund. Azayikina mu gihe cy'umwaka umwe.

Merino w'imyaka 21 y'amavuko, yakinnye mu mikino ya shampiyona y'Uburayi y'abatarengeje imyaka 21 y'amavuko yabaye mu kwezi kwa gatandatu. Icyo gihe Espanye yatsinzwe n'Ubudage ku mukino wa nyuma.

Yakiniye ikipe ya Osasuna yo muri Espanye inshuro 50, mbere yuko yerekeza mu ikipe ya Dortmund yo mu Budage ku mpeshyi y'umwaka ushize. Ariko yakiniye Dortmund inshuro 9 zonyine.

Kuri iyi mpeshyi, abaye umukinnyi wa gatanu uguzwe n'ikipe ya Newcastle United iherutse kuzamuka isubira muri Premier League.

Akurikiye abakinnyi Christian Atsu, Florian Lejeune, Jacob Murphy na Javier Manquillo, bamaze kugurwa n'umutoza Rafael Benitez.

Merino yagize ati: "Ndabizi ko ari ikipe ikomeye kandi iri mu mujyi mwiza cyane. Nari mfite amahitamo menshi ariko ndatekereza ko iyi kipe ari yo imbereye yo gukinamo".