Zamalek yirukanye umutoza Inacio

Augusto Inacio yirukanywe na Zamalek nyuma yuko we n'iyo kipe bumvikanye ku mafaranga yo kumuha ngo kontaro yari afite iburizwemo Uwufise ububasha kw’isanamu Getty Images
Image caption Augusto Inacio yirukanywe na Zamalek nyuma yuko we n'iyo kipe bumvikanye ku mafaranga yo kumuha ngo kontaro yari afite iburizwemo

Ikipe y'ikigugu yo mu Misiri ya Zamalek yirukanye umutoza w'Umunyaportugali Augusto Inacio nyuma y'igihe kitagera ku mezi ane yari amaze ayitoza.

Umutoza Inacio yokejwe igitutu nyuma yuko uyu mwaka Zamalek inaniwe kugera mu mikino ya kimwe cya kabiri mu irushanwa ry'amakipe yabaye aya mbere iwayo ku mugabane w'Afurika.

Kunganya n'ikipe ya Al Ahly Tripoli byabaye indunduro y'urugendo rwa Zamalek muri iryo rushanwa.

Muri iki cyumweru, Zamalek yanatsinzwe n'ikipe ya Al-Ahed yo muri Lebanon, mu mikino ya shampiyona ihuza ibihugu by'Abarabu.

Uko kongera gutsindwa kongereye igitutu kuri Bwana Inacio w'imyaka 62 y'amavuko. Perezida w'ikipe ya Zamalek, Mortada Mansour, yahise amutumiza mu nama.

Nyuma yaho habaye indi nama, irangira Bwana Inacio yirukanywe n'ikipe ya Zamalek bumvikanye ku mafaranga yo kumuha ngo kontaro yari afite iburizwemo.

Avuye muri iyo nama na Bwana Mansour, nibwo Bwana Inacio yabwiye abanyamakuru ko yeguye ku butoza bwa Zamalek.

Yagize ati: "Nasoje kontaro yanjye na Zamalek. Ubu mbaye umwe mu bafana b'iyi kipe".