Paulinho yaguzwe na Barcelona

Paulinho Uwufise ububasha kw’isanamu Getty Images
Image caption Paulinho yahoze muri Tottenham mbere yo kujya mu Bushinwa.

Ikipe ya Barcelona yaguze umunya Bresil Paulinho imuvanye mu ikipe yo mu Bushinwa ya Guangzhou Evergrande.

Uyu mukinnyi ukina hagati yaguzwe amafaranga y'amayero agera kuri miliyoni mirongo ine.

Paulinho - wahoze akinira ikipe ya Tottenham yo mu Bwongereza - afite imyaka 29 y'amavuko.

Niwe wa mbere ikipe ya Barcelona iguze nyuma yo kugurisha Neymar n'ikipe ya Paris St-Germain yo mu Bufaransa ku kiguzi cyesheje umuhigo ku isi mu kuba hejuru cyane.

Paulinho yari yarageze muri Tottenham avuye muri Corinthians ku giciro cya miliyoni 17 z'amapawundi akoreshwa mu Bwongereza muri 2013 mbere yo kujya mu Bushinwa muri 2015.

Hagati aho, Luis Suarez ukina imbere muri Barcelona, agiye kumara hagati y'ibyumweru bine na bitanu adakina kubera imvune yavanye mu mukino w'igikombe cya Super Cup ikipe ye yatsinzwemo na Real Madrid.

Uyu mukinnyi ukomoka muri Uruguay kandi ntabwo azabasha gukina mu mikino yo guhatanira itike y'igikombe cy'isi Uruguay izakina na Argentina na Paraguay.

Barcelona kandi irifuza kugura umukinnyi wo hagati wa Liverpool, Philippe Coutinho na Ousmane Dembele ukina imbere muri Borussia Dortmund.