Neymar: Barcelona "ikwiye ubuyobozi bwiza kurushaho"

Neymar amaze gutsinda ibitego bitatu mu mikino ibiri amaze gukinira PSG Uwufise ububasha kw’isanamu Getty Images
Image caption Neymar amaze gutsinda ibitego bitatu mu mikino ibiri amaze gukinira PSG

Rutahizamu Neymar w'ikipe ya Paris St-Germain yanenze abayobozi b'ikipe yahoze akinamo ya Barcelona yavuyemo mu ntangiriro y'uku kwezi.

Yaguzwe amapawundi miliyoni 200, amafaranga atari yarigeze agurwa undi mukinnyi w'umupira w'amaguru ku isi.

Neymar, umukinnyi mpuzamahanga ukomoka muri Brazil, yatangaje ayo magambo nyuma yo gutsinda ibitego bibiri mu mukino ikipe ye ya Paris St-Germain yatsinze Toulouse ibitego 6 kuri 2.

Wari na wo wa mbere akiniye ku kibuga cya Paris St-Germain.

Neymar w'imyaka 25 y'amavuko, yagize ati: "Nahamaze imyaka ine merewe neza ndetse nishimye. Ariko n'abayobozi bayo, oya".

Yongeyeho ati: "Ku bwanjye, nsanga atari bo bagakwiye kuba bayoboye Barca. Barca ikwiye abayobozi beza kurushaho".

Ibitego bibiri Neymar yatsinze Toulouse byatumye ageza ku giteranyo cy'ibitego bitatu amaze gutsingira Paris St-Germain mu mikino ibiri ibanza.

Kuva Neymar yava muri Barca, Barca yatsinzwe na Real Madrid ku giteranyo cy'ibitego 5-1, itwarwa ityo igikombe cya Espanye.

Mu gihe Barca igishakisha uwasimbura Neymar, ku nshuro eshatu Liverpool yayimye umukinnyi Philippe Coutinho ndetse Barca yananiwe kugura rutahizamu Ousmane Dembele w'ikipe ya Borussia Dortmund.

Ariko Barca yashoboye kugura Paulinho, umukinnyi wo hagati wahoze akinira Tottenham.

Ndetse ku cyumweru, Barca yatangiye imikino ya shampiyona y'uyu mwaka itsinda Real Betis ibitego 2-0.

Neymar yagize ati: "Ubu sinavuga kuko ndi mu yindi kipe".

Yongeyeho ati: "Sinzi ibiri kuhaba ubu ngubu, ariko mbona abo twahoze dukinana bababaye, kandi nanjye birambabaza kuko mpafite inshuti nyinshi".

"Nizeye ko ibintu bizaba byiza kurushaho muri Barca ndetse bakaba ikipe ishobora guhangana n'andi makipe".