Rooney ngo agiye kwibanda ku gukinira Everton kurusha Ubwongereza

Rooney yishimiye igitego cye cya 200 ashyira intoki ze ku matwi imbere y'abafana ba Manchester City Uwufise ububasha kw’isanamu Reuters
Image caption Rooney yishimiye igitego cye cya 200 ashyira intoki ze ku matwi imbere y'abafana ba Manchester City

Nyuma yo kuzuza ibitego 200 muri shampiyona ya Premier League, rutahizamu Wayne Rooney aravuga ko ari "kwibanda kuri Everton" kurusha kuba yakongera gukinira igihugu cy'Ubwongereza.

Rooney w'imyaka 31 y'amavuko, yinjije igitego gifungura umukino ubwo ku wa mbere Everton yanganyaga na Manchester City 1-1. Cyari igitego cya kabiri atsinze mu mikino ibiri ya shampiyona.

Gareth Southgate, umutoza w'ikipe y'igihugu y'Ubwongereza, ntabwo yamukinishije mu mikino Ubwongereza bwakinnye na Scotland na Espanye mu kwezi kwa gatandatu.

Rooney yagize ati: "Nzi neza ko nzavugana na Gareth Southgate mu minsi micye iri imbere. Tuzareba ikizava mu kuganira kwacu".

Kuri uyu wa kane, umutoza Southgate yitezwe gutangaza urutonde rw'abakinnyi azifashisha mu mikino y'amajonjora y'igikombe cy'isi.

Ku itariki ya mbere y'ukwezi kwa cyenda, Ubwongereza buzakina na Malta, umukino ubere muri Malta. Iminsi itatu nyuma yaho, Ubwongereza buzakina na Slovakia, umukino ubere mu Bwongereza.