Liverpool yaguze Oxlade-Chamberlain kuri miliyoni 35 z'amapawundi

Alex Oxlade-Chamberlain yageze muri Arsenal avuye mu ikipe ya Southampton mu kwezi kwa munani mu mwaka wa 2011 Uwufise ububasha kw’isanamu Getty Images
Image caption Alex Oxlade-Chamberlain yageze muri Arsenal avuye mu ikipe ya Southampton mu kwezi kwa munani mu mwaka wa 2011

Ikipe ya Liverpool yarangije kugura Alex Oxlade-Chamberlain, umukinnyi wo hagati w'ikipe y'Ubwongereza, wakiniraga Arsenal.

Yamuguze miliyoni 35 z'amapawundi.

Yasinye kontaro y'imyaka itanu. Azajya ahembwa amapawundi ibihumbi 120 buri cyumweru.

Oxlade-Chamberlain w'imyaka 24 y'amavuko, ku wa kabiri yanze kujya mu ikipe ya Chelsea nubwo amafaranga yo kumugura yari yamaze kwemeranywaho.

Oxlade-Chamberlain yari ari mu mwaka we wa nyuma wo gukinira Arsenal. Yanze gusinya kontaro nshya muri Arsenal, aho yajyaga kujya ahembwa amapawundi ibihumbi 180 buri cyumweru.

Mu butumwa yacishije ku rubuga nkoranyambaga rwa Instagram, Oxlade-Chamberlain yagize ati:

"Ndabizi ko ibi bishobora gutungura benshi, kandi umwanzuro wo kugenda wari ukomeye nyuma y'imyaka myinshi nari maze mu ikipe, ariko ndumva uyu mwanzuro ukwiye kugira ngo nkomeze gutera imbere".

Umutoza Jurgen Klopp wa Liverpool yavuze ko yishimye cyane kuba Liverpool yaguze umukinnyi ufite impano "itangaje".

Oxlade-Chamberlain yabanje mu kibuga mu mikino ine ya shampiyona Arsenal imaze gukina uyu mwaka.

Kuva yagera muri Arsenal avuye mu ikipe ya Southampton mu kwezi kwa munani mu mwaka wa 2011, yakiniye Arsenal imikino 198 atsinda ibitego 20.