Igikombe cy'Afurika cy'abagore

Umupira w'amaguru
Image caption Ikipe ya Nigeria y'abagore yatsinze Cameroon ibitego 5 kuri 1

Ikipe y'abagore y'umupira w'amaguru y'igihugu cya Nigeria izakina umukino wa nyuma w'igikombe cy'Afurika cy'abagore nyuma yo gutsinda ikipe y'igihugu cya Cameroon ibitego bitanu kuri kimwe.

Iyi kipe ya Nigeria iboneyeho kandi itike yo kuzakina mu mikino ya nyuma y'igikombe cy'isi cy'abagore izabera mu Budage umwaka utaha. Umukinnyi w'imbere wa Nigeria Perpetua Nkwocha ku nshuro ya kabiri yatsinze ibitego 3 muri rino rushanwa ririmo kubera muri Afurika yepfo.

Helen Ukaonu na Ugochi Oparanozie nibo batsinze ibitego bindi bibiri muri uwo mukino wabahuje n'ikipe ya Cameroon.

Igitego kimwe rukumbi cya Cameroon cyatsinzwe na Jeanette Ngock. Nigeria izakina n'ikipe izatsinda umukino wa kimwe cya kabiri ugomba guhuza Afurika yepfo na Guinee Equatoriale ifite icyo gikombe.