Barcelona irashaka cyane Cesc Fabregas

Cesc Fabregas Uwufise ububasha kw’isanamu Getty
Image caption Umukinnyi wo hagati wa Arsenal, Cesc Fabregas

Umutoza w'ikipe ya Barcelona, Pep Guardiola, yatangaje ko ikipe ye izakora uko ishoboye kose kugirango igure umukinnyi wo hagati wa Arsenal, Cesc Fabregas.

Mu kwezi gushize ikipe ya Arsenal yanze miliyoni 27 z'amapawundi ikipe ya Barcelona yari yiteguye gutanga kuri uyu mukinnyi.

Umutoza Guardiola avuga ko bafite kugeza ku itariki ya 31 z'ukwezi gutaha kugirango babe babashije kumvikana na Arsenal.

Fabregas yahoze mu ikipe y'ingimbi ya Barcelona mbere yo kwinjira muri Arsenal muri 2003 afite imyaka 16 gusa.

Uyu mukinnyi ntabwo ari mu bakinnyi ba Arsenal bagiye muri Aziya gukina imikino yo kwishyushya mbere yuko imikino ya shampiyona y'Ubwongereza itangira mu kwezi gutaha.