Ghana: Ibirego bya ruswa mu mupira w'amaguru

Image caption Kwesi Nyantakyi, umukuru w'ishyirahamwe ry'umupira w'amaguru muri Ghana arahakana ibirego bya ruswa

Ishyirahamwe ry'umupira w'amaguru muri Ghana ryamaganye ibirego bivuga ko ryemeye ko ikipe y'igihugu izakina mu mikino yatanzwemo ruswa.

Ibi birego byaje nyuma y'aho abanyamakuru bo mu kinyamakuru cyo mu Bwongereza, Daily Telegraph na Televiziyo Channel Four, bakoze iperereza mu rwihisho.

Avugisha BBC, umukuru w'iri shyirahamwe ry’umupira w’amaguru muri Ghana, Kwesi Nyantakyi, yavuze ko atigeze yemera gutanga cyangwa guhabwa ruswa mu mikino.

Yongeyeho ko yahawe umushinga w'amasezerano, ariko ko atigeze awushyiraho umukono.

Iri shyirahamwe ryavuze kandi ko abantu 2 bafashwe muri aya mashusho ya videwo, barezwe mu gipolisi.