Amavubi yahawe itariki y'ubujurire

Image caption CAF izumva ubujurire bwa Ferwafa mu mpera z'uku kwezi

Ishyirahamwe ry’umupira w’amaguru muri Afurika – CAF - rizumva ubujurire bw’u Rwanda ku itariki ya 27 z'uku kwezi ku cyemezo cyo guhagarika ikipe y’icyo gihugu mu irushanwa ry'igikombe cy'Afrika ryo mu 2015.

CAF yanze kwemera itsinzi y'u Rwanda mu cyiciro cy'amatsinda rusezereye Congo-Brazaville, nyuma yaho CAF ivuze ko umukinnyi Daddy Birori atarafite uburenganzira bwo gukina muri uwo mukino.

Congo, yahawe umwanya w'u Rwanda, yari yatanze ibirego ko uyu mukinnyi afite impapuro z'inzira z'u Rwanda na Congo, zirimo amazina n'amatariki y'amavukiro abiri.

Uwo musore akinira mu ikipe ya Vita Club y'i Kinshasa ku izina rya Tady Etekiama Agati, agakinira ikipe y'u Rwanda, Amavubi, ku mazina ya Birori Daddy.

Ariko umutoza w'ikipe y'u Rwanda, Stephen Constantine, yabwiye BBC ko abona bararenganijwe, avuga ko kuba uwo mukinnyi yaravukiye muri Congo atari inkuru kuri bo, ngo yari amaze imyaka 5 akinira ikipe y’igihugu cy’u Rwanda.