Dady yahanishijwe kudakina mu gihe k'imyaka 2

Birori yari yakiniye Urwanda mu irushanwa ry'igikombe cya CAF 2015 Uwufise ububasha kw’isanamu Getty Images
Image caption Birori yari yakiniye Urwanda mu irushanwa ry'igikombe cya CAF 2015.

Impuzamashyirahamwe y'umupira w'amaguru muri Afurika - CAF - yahanishije umukinnyi w'ikipe y'igihugu y'Urwanda - Birori Dady - igihano cyo kudakina mu gihe cy'imyaka ibiri kubera gukinira amakipe abiri akoresheje ibyangombwa bitandukanye.

Usibye kuba afite urupapuro rw'inzira (passeport) rw'Urwanda, Dady, afite kandi urupapuro rw'inzira rwo muri Repubulika iharanira demokarasi ya Congo rurimo izina rya Etekiama Agiti Tady.

Muri izo pasiporo ebyiri kandi amatariki y'igihe yavukiyeho aratandukanye.

Dady akinira ikipe ya AS Vita Club akoresheje pasiporo ye yo muri Congo kandi akanakoresha n'izina rya Tady.

Mu kwezi kwa munani CAF yari yafashe icyemezo cyo kuba imuhagaritse kandi inirukana Urwanda mu mikino yo kuhatanira itike yo gukina mu mikino ya nyuma y'igikombe cya Afurika cy'ibihugu iteganijwe umwaka utaha kubera gukinisha umukinnyi ku buryo butemewe n'amategeko.

Icyo cyemezo cya mbere CAF yari yagifashe Congo Brazzavile imaze kwinuba nyuma yaho ikipe y'igihugu cy'Urwanda ikinishirije uyu mukinnyi mu mukino wayihuje n'iya Congo Brazzaville i Pointe Noir mu kwezi gushize.

Urwanda rwakomeje kuvuga ko rwari ruzi ko uyu mukinnyi afite umwirondoro umwe.