Igikombe cya Afurika 2015: Cameroon iri hafi yo kubona itike

Cameroon niyo iri ku mwanya wa mbere mu itsinda irimo Uwufise ububasha kw’isanamu AP
Image caption Cameroon niyo iri ku mwanya wa mbere mu itsinda irimo.

Ikipe y’umupira w’amaguru ya Cameroon yateye intambwe ikomeye mu gushakisha itike yo kujya mu mikino ya nyuma y’igikombe cya Afurika cy’ibihugu nyuma yaho itsindiye Sierra Leone ibitego 2-0 mu mukino waraye ubaye.

Umunyakameruni Leonard Kweuke niwe wafunguye izamu hashize gusa iminota ine umukino utangiye. Icya kabiri cyatsinzwe na Stephane Mbia nyuma y’iminota mikeya.

Mu mukino ubanza amakipe yombi yari yanganyije 0-0.

Iyi ntsinzi ya Cameroon ivuze ko yo na Cote d’ivoire byari guhita bibona itike yo gukina imikino ya nyuma y’igikombe cya Afurika izaba umwaka utaha iyo iyi Cote d’ivoire iba yatsinze nkuko byari byitezwe Repubulika iharanira demokarasi ya Congo.

Umukino wahuje aya makipe yombi rero warangiye Repubulika iharanira demokarasi ya Congo itsinze Cote d’ivoire ibitego 4-3.

Ibyo bivuze rero ko muri rino tsinda Cameroon ariyo iri ku mwanya wa mbere n’amanota 10, naho Cote d’ivoire na Repubulika iharanira demokarasi ya Congo bifite buri kipe amanita 6 mu gihe Sierra Leone ari iya nyuma n’amanota 5.

Hakurikijwe amategeko y’impuzamashyirahamwe y’umupira w’amaguru muri Afurika – CAF - Repubulika iharanira demokarasi ya Congo rero iza imbere ya Cote d’ivoire kubera ko yatsinze ibitego byinshi kuyirusha mu mikino yakiniye hanze.