Zambia yishyuye Bonetti kugirango idahanwa

Leta ya Zambia yatinyaga ko ikipe yayo ishobora guhanwa na FIFA. Uwufise ububasha kw’isanamu Getty
Image caption Leta ya Zambia yatinyaga ko ikipe yayo ishobora guhanwa na FIFA.

Leta ya Zambia yishyuye umwenda yari ibereyemo Dario Bonetti wahoze ari umutoza w'ikipe y'igihugu mu mupira w'amaguru kugirango idahanwa n'ishyirahamwe ry'umupira w'amaguru ku isi, FIFA.

Zambia yari ibereyemo umwenda Dario Bonetti ungana n'amadolari y'abanyamerika 432000.

Bonetti yatoje ikipe y'igihugu cya Zambia guhera mu kwezi kwa karindwi kwa 2010 kugeza mu kwa cumi 2011.

Yasezerewe ku mirimo ye asigaje amezi icyenda ngo amasezerano ye y'akazi arangire nubwo bwose ikipe ye yari imaze kubona itike yo gukina imikino ya nyuma y'igikombe cya Afurika cyo muri 2012.

Yari yarareze Zambia muri FIFA kandi urubanza ruteganijwe kuburanishwa mu kwezi kwa munani.

Nyuma yaho Zimbabwe ihanishirijwe kwirukanwa mu mikino yo guhatanira itike yo kujya mu gikombe cy'isi cya 2018 kubera kutishyura umutoza wayo Jose Claudinel Georgini, hari hari impungenge ko na Zambia yashoboraga kuzahanwa iyo iramuka itishyuye Bonetti.