Asisat Oshoala yegukanye igihembo cya BBC

Image caption Umukinnyikazi w'umupira w'amaguru, Asisat Oshoala, wegukanye igihembo cya BBC mu rwego rw'abagore

Asisat Oshoala yegukanye igihembo cya BBC cy'umukinnyi witwaye neza mu bagore Umukinnyikazi ukomoka muri Nijeriya unakinira Liverpool Asisat Oshoala yatoranyijwe nk'umukinnyikazi wahize abandi mu mupira w'amaguru, mu gihembo cya BBC cy'umwaka.

Rutahizamu w'imyaka 20 y'amavuko, abaye uwa mbere utsindiye igihembo gishya gitangwa na BBC World Service. Amatora akorwa n'abafana ku isi hose.

Yatsinze umunyasipaniyakazi Veronica Boquete, umudagekazi Nadine Kessler, umunyasikotilandi (scotland), Kim Little n'Umunyaburezirekazi Marta. Yagize ati: "nagira ngo nshimire BBC, abafana banjye ku isi hose n'undi wese watoye."

Iki ni igihembo cya mbere gitanzwe n'igitangazamakuru mpuzamahanga. Oshoala, washyizwe ku rutonde rw'umukinnyi muto cyane, yabaye rutahizamu watsinze ibitego byinshi mu gikombe cy'isi cy'abari munsi y'imyaka 20 muri Canada mu cyi ry'umwaka ushize.

Kandi yatoranyijwe nk'umukinnyi w'intyoza mu irushanwa ryose.

Imikinire ye yagejeje Nijeriya ku mukino wa nyuma, aho batsindinzwe n'u Budage.

Yanagize uruhare rukomeye mu ikipe nkuru y'abagore yatwaye igikombe cya Afurika mu kwezi kwa cumi.

Ibi byatumye babona itike yo gukina mu gikombe cy'isi kizabera muri Canada guhera ku itariki ya 6 z'ukwezi kwa gatandatu.

Imikino izatambuka uko yakabaye kuri BBC.

Oshoala yatangaje ko iki gihembo ari ikintu gikomeye kuri Nijeriya mbere y'imikino y'igikombe cy'isi muri Canada.

Kandi ko kizatera akanyabugabo abakinnyi bato muri Nijeriya.