Mourinho yarakariye cyane ikipe ye

Chelsea niyo yatwaye igikombe cya shampiyona ishize. Uwufise ububasha kw’isanamu Reuters
Image caption Chelsea niyo yatwaye igikombe cya shampiyona ishize.

Umutoza w'ikipe ya Chelsea, Jose Mourinho, yahaye ikipe ye amanota -1 ku 10 kubera ukuntu yakinnye mu gice cya mbere mu mukino w'umupira w'amaguru wayihuje na Newcastle kuwa gatandatu.

Uwo mukino warangiye amakipe yombi anganya 2-2.

Mu gice cya kabiri Chelsea yagerageje gukina neza inishyura ibitego bibiri yari yatsinzwe ariko rero ibi ntibyabujije umutoza wayo kurakazwa cyane n'uko yakinnye mu gice cya mbere.

Mourinho yagize ati: "Twakinnye nabi cyane mu gice cya mbere. Byari bibi cyane ku buryo mu gihe cy'ikiruhuko nifuzaga kuba nasimbura abakinnyi batandatu kandi nemerewe gusa batatu."

Ibitego bya Newcastle - itifashe neza cyane muri iyi shampiyona - byatsinzwe na Ayoze Perez na Georginio Wijnaldum kugeza ku munota wa 60.

Ariko rero Chelsea yakoze iyo bwabaga maze ibona inota kubera ibitego bya Ramires na Willian binjiye mu kibuga basimbuye.

Chelsea ifite igikombe ya shampiyona cy'umwaka ushize ubu iri ku mwanya wa 15 n'amanota 8 mu gihe Manchester United iri ku mwanya wa mbere ifite amanota 16.