Umutekano uracungerewe cyane i Kampala

Abarwanyi ba Al Shabaab
Image caption Abarwanyi ba Al Shabaab

Polisi yo muri Uganda yarushijeho gucengera umutekano kubera gutinya ko imitwe ikorana na Al Qaida ishobora guturitsa ibisasu muri kino gihe cy'iminsi mikuru ya Noheli n'Ubunani.

Umukuru wa polisi - Generali Kale Kayihura - yavuze ko bafite amakuru avuga ko imitwe ya Al Shababu, Al Qaida, n'umutwe wa ADF irimo utegura ibitero.

Mu kwezi kwa karindwi k'uno mwaka abantu babarirwa kuri 70 baguye mu bisasu byatezwe n'ibyihebe mu tubari tubiri mu mujyi wa Kampala igihe barebaga kuri televisiyo imikino ya nyuma y'igikombe cy'isi cy'umupira w'amaguru.

Umunyamakuru wa BBC uri i Kampala aravuga ko biboneka ko umutekano ucungerewe cyane kubera za bariyeri ziri mu mihanda n'abapolisi baboneka imbere y'amarestora n'ububari.