Shugabannin Kannywood sun kori Rahama Sadau

Rahama Sadau ta dare bayan Classiq a sabon faifan bidiyon wakarsa da ya fitar mai suna "I Love You"
Image caption MOPPAN ta ce rungumar Classiq da Rahama Sadau ta yi ta saba da ka'idojin kungiyar

Hadaddiyar kungiyar masu ruwa da tsaki a harkar shirya fina-finan Hausa, wato MOPPAN, ta kori shahararriyar 'yar wasan kwaikwayon nan Rahama Sadau.

Wannan mataki dai ya biyo bayan wani taro ne da kungiyar ta yi da yammacin ranar Lahadi.

A wata sanarwa da sakatarenta, Salisu Mohammed (Officer), ya sanyawa hannu, ta ce ta dauki wannan mataki ne da yawun dukkan kungiyoyin masu harkar shirya fina-finai, wadanda ke da wakilci a kungiyar.

Kungiyar ta ce 'yar wasan ta yi karan-tsaye ga ka'idojin kyawawan dabi'un da Kannywood ta ginu a kansu, lamarin da ta ce shugabannin harkar ba za su lamunce da shi ba.

Sanarwar ta kara da cewa an sallami 'yar wasan ne saboda fitowar da ta yi a wani faifan bidiyo na waka, inda take rungumar wani mawaki mai suna Classiq.

Kungiyar ta kuma ce an kafa wani kwamiti da zai saurari korafe-korafe da martani game da wannan mataki, musamman daga furodusoshin (masu shirya fina-finan) da a yanzu haka take taka rawa a fina-finansu.

Faifan bidiyon da Rahama ta fito a ciki dai ya jawo ce-ce-ku-ce a tsakanin masu sha'awar fiana-finan Hausa.

Har yanzu dai jarumar, wacce ke kasar Indiya, ba ta ce komai ba a kan matakin.

Karin bayani