Guguwa ta yi mummunan ta'adi a Haiti

Mutane da dama sun rasa gidajensu Hakkin mallakar hoto Reuters
Image caption Guguwar ta yi mummunan ta'adi

Mahaukaciyar guguwar da aka yi wa lakabi da Mathew mai gudun kilomita dari biyu da ashirin a cikin sa'a guda ta yi ta'adi a Haiti .

Har yanzu ba a san ko mutane nawa ne suka mutu ba.

Guguwar ta lalata amfanin gona da kuma gidajen da ke bakin teku a kudancin kasar.

Tun da farko rahotanni sun ce guguwar ta yi sanadiyyar mutuwar mutane biyu a Haiti da kuma wasu hudu a makwabciyar ta, to sai dai daga baya hukumomi sun ce ba a san yawan mutanen da suka mutu ba.

Jami'in majalisar dinkin duniya a Haiti Mourad Wahba ya ce ana bukatar agajin gaggawa a kasar.

Guguwar dai ita ce mafi muni tun bayan mummunar girgizar kasar da akayi shekaru shida da suka gabata.

Yanzu haka dai guguwar ta Mathew ta tasamma Cuba.