'Kasashen yamma na yin katsalandan kan lantarkin Nigeria'

Kemi Adeosun Hakkin mallakar hoto Getty Images
Image caption Kemi Adeosun ta ce kasashen yamma ba su yi wa Najeriya adalci ba

Ministar kudin Najeriya Kemi Adeosun ta yi zargin cewa kasashen yammacin duniya ne ke yin kafar-ungulu a yunkurin da kasar ke yi na samun hasken wutar lantarki ta hanyar makamashin kwal.

Ministar ta yi wannan zargi ne a Amurka, inda ake yin taro tsakanin kasashen da suka ci gaba da bankin duniya da kuma asusun ba da lamuni na duniya kan yadda za a cike gibin da aka samu na abubuwan more rayuwa.

A cewarta, "Muna son gina tasoshin samar da hasken wutar lantarki ta amfani da kwal saboda Allah ya albarkaci kasarmu da ma'adinin, amma kasashen yammacin duniya na yi mana tarnaki kan shirinmu saboda suna ganin yin amfani da kwal zai gurbata muhalli. Gaskiya ba a yi mana adalci ba."

Ministar ta kara da cewa kasashen yammacin duniyar sun umarci Najeriya da ta yi amfani da hasken rana da sauran hanyoyin da ba sa yin illa ga muhalli idan tana son samar da hasken wutar lantarki.

Kemi Adeosun ta ce an gina duk wasu abubuwan ci gaban kasashen yamma ne ta hanyar amfani da makamashin kwal, don haka bai dace a hana kasashe irinsu Najeriya yin amfani da shi domin ci gaban kasashensu ba.

Labarai masu alaka