Hirar BBC da Aisha: Buhari ya yi amai ya lashe

Buhari da Angela Markel Hakkin mallakar hoto Nigeria Government
Image caption Shugaba Muhammadu Buhari na mgana ne tare da Shugabar Jamus Angela Markel

Shugaban Nigeria Muhammadu Buhari ya ce raha yake lokacin da ya ce dafa abinci ne aikin matarsa, bayan zazzafar hirar da aka yi da ita a BBC, inda ta caccaki yadda gwamnatinsa ke tafiya.

Kalaman da Mista Buhari ya yi a Jamus cewa aikin matarsa shi ne "dafa abinci, kula da falo da kuma daki" ya jawo suka daga mutane da dama musamman mata.

Wasu sun rika kwatanta shugaban da dan takarar shugabancin Amurka Donald Trump wanda a kwanan nan aka nuno shi yana kalaman batsa.

"Dole ne a siyasa sai an hada da raha domin a kara mata armashi", a cewar mai magana da yawun shugaban Malam Garba Shehu.

Ya kara da cewa "Mu da muke kusa da shi mun san cewa ba ya rabo da raha".

Shugaba Buhari ya kara da cewa yana mutunta matsayin mata a cikin al'umma.

Ya ce hakan ne ma ya sa ya nada mace Kemi Adeosun (ministar kudi), akan daya daga cikin mukaman da suka fi kowanne muhimmanci a gwamnatinsa.

Na'urarku na da matsalar sauraren sauti
Hirar BBC da Aisha Buhari ta tayar da kura

Ita dai uwargidan shugaban, Aisha Buhari, ta gargadi mijinta cewa ba za ta goyi bayan takararsa a 2019 ba idan har al'amura suka ci gaba da tafiya a haka.

"Bai gaya min cewa zai tsaya ko ba zai tsaya ba tukunna, amma na yanke shawara a matsayina na matarsa, cewa idan abubuwa suka ci gaba da tafiya a haka, to ba zan shiga cikin tafiyar ba.

"Idan har abubuwa ba su sauya ba, to ba zan fita na yi yakin neman zabe kamar yadda na yi a baya ba. Ba zan sake yi ba".

Za ku iya sauraran hirar da ta yi wannan bayani da sauran muhimman abubuwan da ta fada a shirinmu na Ganemi Mini Hanya a ranar Asabar.

Labarai masu alaka