Mutane 24 sun mutu a turmutsitsi a India

Hakkin mallakar hoto EPA
Image caption Wurin da aka samu turmutsitisn jama'a a India

Akalla mutane ashirin da hudu ne suka mutu a turmutsitsin da aka samu a wajen wani taron addini a arewacin Indiya.

Dubban mabiya addinin Hindu, karkashin koyarwar Jai Gurudev ne suka taru a Varanasi, a garin Uttar Pradesh, wanda gari ne mai tsarki a wurin mabiya addinin na Hindu da dama.

Ba a tabbatar da dalilin da ya haddasa turmutsitsin ba.

Sai dai, turmutsitsi ba sabon abu ba ne a Indiya, inda tarukan addini da na siyasa ke sa mutane ne cincirindo a wuri guda, kuma ba a iya tafiyar da tarukan yadda ya kamata.